مَا لَا يَسَعُ المُسْلِمَ جَهْلُهُ

وہ بنیادی باتیں جن سے لاعلم رہنا کسی مسلمان کے لیے روا نہیں

اللَّجْنَةُ العِلْمِيَّةُ

بِرِئَاسَةِ الشُّؤُونِ الدِّينِيَّةِ بِالمَسْجِدِ الحَرَامِ وَالمَسْجِدِ النَّبَوِيِّ

مسجد حرام اور مسجد نبوی میں دینی امور کے سربراہ ادارہ کے ماتحت علمی کمیٹی

بِسْمِ اللَّهِ الرَّحْمَنِ الرَّحِيمِ

وہ بنیادی باتیں جن سے لاعلم رہنا کسی مسلمان کے لیے روا نہیں

مقدّمہ

الحمد لله رب العالمين، والصلاة والسلام على المبعوث رحمة للعالمين، وعلى آله وصحبه ومن استنَّ بسنته، واهتدى بهديه إلى يوم الدين، أما بعد:

یہ ایک مختصر رسالہ ہے جس میں مسلمان کوعقیدہ، عبادات اور معاملات کے باب میں جن اہم امور کی ضرورت ہوتی ہے‘ انہیں شامل کیا گیا ہے، ہم نے اسے حرمین شریفین کی زیارت کرنے والے حضرات وخواتین کے لیے مرتب کیا ہے تاکہ وہ اپنے دینی امور سے آگاہی اور بصیرت حاصل کر سکیں۔ ہم کریم ومنان اللہ سے دعا کرتے ہیں کہ وہ اس سے نفع پہنچائے، اسے کارگر اور اپنے چہرے کے لیے خالص بنائے، بے شک وہ بہترین سوال کیا جانے والا اور سب سے زیادہ کرم کرنے والا ہے۔

پہلی فصل:

عقیدے کا بیان

پہلا مبحث: اسلام کا معنی ومفہوم اور اس کے ارکان:

اسلام یعنی : توحید کے ذریعہ اللہ کے سامنے سر تسلیم خم کرنا، اطاعت کے ذریعہ اس کی پیروی کرنا اور شرک اور مشرکوں سے براءت کا اظہار کرنا۔

اسلام کے ارکان پانچ ہیں:

پہلا رکن: اس بات کی گواہی دینا کہ اللہ کے سوا کوئی معبود برحق نہيں ہے اور محمد ﷺ اللہ کے رسول ہيں۔

دوسرا رکن: نماز قائم کرنا۔

تیسرا رکن: زکاۃ دینا۔

چوتھا رکن: رمضان کے روزے رکھنا۔

پانچواں رکن: استطاعت رکھنے والوں کے لئے بیت اللہ کا حج کرنا۔

توحید کی اہمیت:

معلوم رہے کہ اللہ سبحانہ وتعالی نے مخلوقات کو محض اس لیے پیدا کیا کہ وہ اسی کی عبادت کریں اوراس کے ساتھ کسی کو شریک نہ کریں۔ اللہ تعالی کا فرمان ہے:

﴿وَمَا خَلَقۡتُ ٱلۡجِنَّ وَٱلۡإِنسَ إِلَّا لِيَعۡبُدُونِ 56﴾

”اور میں نے جن وانس کو صرف اسی لیے پیدا کیا ہے کہ وہ میری عبادت کریں۔“ [الذاریات : 56]، اس عبادت کی معرفت علم ہی کے ذریعہ حاصل ہو سکتی ہے۔ جیسا کہ اللہ تعالیٰ کا ارشاد ہے:

﴿فَٱعۡلَمۡ أَنَّهُۥ لَآ إِلَٰهَ إِلَّا ٱللَّهُ وَٱسۡتَغۡفِرۡ لِذَنۢبِكَ وَلِلۡمُؤۡمِنِينَ وَٱلۡمُؤۡمِنَٰتِۗ وَٱللَّهُ يَعۡلَمُ مُتَقَلَّبَكُمۡ وَمَثۡوَىٰكُمۡ 19﴾

"تو آپ اس کا یقین رکھیے کہ بجز اللہ کے کوئی معبود برحق نہیں اور اپنی خطا کی معافی مانگتے رہیے اور سارے ایمان والوں اور ایمان والیوں کے لیے بھی۔ اور اللہ خوب خبر رکھتا ہے تم (سب) کے چلنے پھرنے اور رہنے سہنے کی"۔ [محمد : 19] چنانچہ اللہ تعالیٰ نے قول وعمل سے پہلے علم کا ذکر کیا ہے۔ اور سب سے اہم بات جس کا سیکھنا مسلمان پر واجب ہے وہ اللہ عز وجل کى توحید ہے؛ کیوں کہ دین کی بنیاد اسی پر قائم ہے، توحید کے بغیر دین کا قیام ہی نہیں ہو سکتا۔ یہی ایک مسلمان پر پہلا اور آخری واجب ہے، اسلام کے ارکان کا علم حاصل کرنا اور ان پر عمل کرنا ضروری ہے، یہ پانچ ارکان ہیں جن میں توحید سب سے پہلا رکن ہے، عبداللہ بن عمر رضی اللہ عنہما سے روایت ہے‘ وہ کہتے ہیں: میں نے اللہ کے رسول ﷺ کو فرماتے ہوئے سنا: «بُنِيَ الإسْلَامُ عَلَى خَمْسٍ: شَهَادَةِ أنْ لَا إلَهَ إلَّا اللَّهُ وأنَّ مُحَمَّدًا رَسُولُ اللَّهِ، وَإقَامِ الصَّلَاةِ، وَإيتَاءِ الزَّكَاةِ، وَحَجِّ البَيْتِ، وصَوْمِ رَمَضَانَ». ”اسلام کی بنیاد پانچ چیزوں پر ہے: اس بات کی گواہی دینا کہ اللہ کے سوا کوئی سچا معبود نہیں اور بے شک محمد ﷺ اللہ کے سچے رسول ہیں اور نماز قائم کرنا، زکوٰۃ ادا کرنا، خانہ کعبہ کا حج کرنا اور رمضان کے روزے رکھنا۔“¹

چنانچہ ایک مسلمان پر توحید کا معنی ومفہوم سیکھنا واجب ہے؛ جو کہ صرف ایک اللہ تعالی کی عبادت کرنا ہے۔ نہ اس کی عبادت میں اس کے ساتھ کسی اور کو شریک کیا جائے، نہ کسی مقرب فرشتے کو اور نہ ہی کسی نبی مرسل کو۔

لا الہ الا اللہ کی گواہی کے معنی یہ ہیں:

بندہ پورے یقین کے ساتھ یہ اقرار کرے کہ اللہ عز وجل کے سوا کوئی سچا معبود نہیں، چنانچہ صرف ایک اللہ کی عبادت کرے اور عبادت کی ساری قسموں کو اس کے لیے خاص کر دے جیسے دعا، خوف، امید اور توکل وغیرہ۔

یہ گواہی دو رکنوں کے بغیر نا مکمل ہے:

پہلا: اللہ تعالی کے سوا تمام معبودان باطلہ کی عبادت والوہیت کا انکار کرنا۔

دوسرا: صرف اللہ تعالی کے لیے ہر قسم کی عبادت والوہیت کو ثابت کرنا اللہ تعالی کا فرمان ہے:

﴿‌وَلَقَدۡ بَعَثۡنَا فِي كُلِّ أُمَّةٖ رَّسُولًا أَنِ ٱعۡبُدُواْ ٱللَّهَ وَٱجۡتَنِبُواْ ٱلطَّٰغُوتَۖ...﴾

"ہم نے ہر امت میں رسول بھیجا کہ (لوگو!) صرف اللہ کی عبادت کرو اور اس کے سوا تمام معبودوں سے بچو..."۔ [النحل: 36]۔

”لا إِلٰهَ إِلا اللہ“ کے شروط یہ ہیں:

پہلی شرط: علم جو جہل کے منافی ہے۔

دوسری: یقین جو شک کے منافی ہے۔

تیسری: اخلاص جو شرک کے منافی ہے۔

چوتھی: سچائی جو جھوٹ کے منافی ہے۔

پاںچویں: محبت جو بغض کے منافی ہے۔

چھٹی: فرماںبرداری جو ترک کرنے کے منافی ہے۔

ساتویں: قبول جو رد کرنے کے منافی ہے۔

آٹھویں: معبودان باطلہ کا انکار۔

ان شروط پہ عمل کرنا واجب ہے، ان تمام شرطوں کو دو اشعار میں جمع کردیا گیا ہے جو اس طرح ہیں:

علم، یقین، اخلاص اور سچائی نیز محبت واطاعت اور قبولیت

اور آٹھویں بات کا اضافہ کیا گیا ہے: تیرا ان ساری چیزوں کا انکار کرنا جن کو اللہ کے سوا پوجا جاتا ہے۔

یہ گواہی اخلاص کے ساتھ صرف اللہ تعالی کی عبادت کرنے سے ثابت ہوگی جس کا کوئی شریک وساجھی نہیں ہے۔ اس کا تقاضا ہے کہ اللہ کے سوا کسی کو نہ پکارے، اللہ اتعالی ہی پر بھروسہ رکھے، اللہ کے سوا کسی سے امید نہ رکھے، اللہ کے سوا کسی اور کے لیے نماز نہ پڑھے اور اللہ کے سوا کسی اور کے لیے ذبح نہ کرے۔

کچھ لوگ جو قبروں کے گرد طواف کرتے ہیں، قبر والوں سے فریاد کرتے ہیں اور اللہ تعالی کو چھوڑ کر انہیں پکارتے ہیں؛ یہ سب عبادت میں شرک ہے، لہذا ان باتوں سے بچنا اور خبردار کرنا ضروری ہے؛ کیوں کہ یہ مشرکوں کی ان عبادتوں کی طرح ہے جو وہ اللہ تعالی کو چھوڑ کر درختوں، پتھروں اور بتوں کے لیے کرتے ہیں، یہی وہ شرک ہے جس سے روکنے اور آگاہ کرنے کے لیے کتابیں نازل کی گئیں اور رسول بھیجے گئے۔

اللہ کے رسول محمد ﷺ کی گواہی دینے کا معنی:

آپ ﷺ کے حکم کی تعمیل کرنا، آپ کی بتائی ہوئی باتوں کی تصدیق کرنا، آپ کی منع کی ہوئی باتوں سے اجتناب کرنا اور صرف آپ کے بتائے ہوئے طریقے کے مطابق اللہ کی عبادت کرنا۔ چنانچہ ایک مسلمان یہ اقرار کرتا ہے کہ محمد بن عبد اللہ قرشی ہاشمی تمام انس وجن کے لیے اللہ تعالی کے رسول ہیں، جیسا کہ اللہ تعالیٰ کا ارشاد ہے:

﴿قُلۡ يَٰٓأَيُّهَا ٱلنَّاسُ إِنِّي رَسُولُ ٱللَّهِ إِلَيۡكُمۡ جَمِيعًا...﴾

”آپ کہہ دیجیے کہ اے لوگو! میں تم سب کی طرف اللہ تعالیٰ کا بھیجا ہوا رسول ہوں“۔ [الأعراف: 158]

اور اس بات کا اقرار کرتا ہے کہ اللہ تعالی نے آپ کو اپنے دین کی تبلیغ اور لوگوں کی ہدایت کے لیے بھیجا، جیسا کہ اللہ تعالیٰ کا ارشاد ہے:

﴿‌وَمَآ أَرۡسَلۡنَٰكَ إِلَّا كَآفَّةٗ لِّلنَّاسِ بَشِيرٗا وَنَذِيرٗا وَلَٰكِنَّ أَكۡثَرَ ٱلنَّاسِ لَا يَعۡلَمُونَ 28﴾

"ہم نے آپ کو تمام لوگوں کے لئے خوشخبریاں سنانے واﻻ اور ڈرانے واﻻ بنا کر بھیجا ہے، مگر لوگوں کی اکثریت بےعلم ہے"۔ [سبا: 28] نیز اللہ تعالی نے فرمایا:

﴿‌وَمَآ أَرۡسَلۡنَٰكَ إِلَّا رَحۡمَةٗ لِّلۡعَٰلَمِينَ 107﴾

"اور ہم نے آپ کو تمام جہان والوں کے لیے رحمت بنا کر ہی بھیجا ہے"۔ [الانبياء: 107]۔

اس گواہی کا تقاضا یہ ہے کہ آپ یہ باطل عقیدہ نہ رکھیں کہ رسول اللہ ﷺ کا ربوبیت یا عبادت میں کوئی حق ہے یا اس کائنات کی تدبیر میں آپ کو کوئی اختیار ہے، بلکہ آپ ﷺ بندے ہیں جن کی عبادت نہیں کی جا سکتی اور رسول ہیں جن کی تکذیب نہیں کی جا سکتی، اور اللہ تعالی کے دائرۂ مشیئت کے باہر آپ نہ اپنے لیے نفع ونقصان کے مالک ہیں اور نہ ہی دوسروں کے لیے، جیسا کہ اللہ تعالیٰ کا ارشاد ہے:

﴿‌قُل لَّآ أَقُولُ لَكُمۡ عِندِي خَزَآئِنُ ٱللَّهِ وَلَآ أَعۡلَمُ ٱلۡغَيۡبَ وَلَآ أَقُولُ لَكُمۡ إِنِّي مَلَكٌۖ إِنۡ أَتَّبِعُ إِلَّا مَا يُوحَىٰٓ إِلَيَّ...﴾

" آپ کہہ دیجئے کہ نہ تو میں تم سے یہ کہتا ہوں کہ میرے پاس اللہ کے خزانے ہیں اور نہ میں غیب جانتا ہوں اور نہ میں تم سے یہ کہتا ہوں کہ میں فرشتہ ہوں۔ میں تو صرف جو کچھ میرے پاس وحی آتی ہے اس کی اتباع کرتا ہوں..." [الأنعام: 50]

دوسرا مبحث: ایمان کا معنی ومفہوم اور اس کے ارکان:

ایمان: دل سے اقرار کرنے، زبان سے بولنے، دل اور اعضاء وجوارح سے عمل کرنے کا نام ہے، یہ اطاعت سے بڑھتا اور نافرمانی سے گھٹتا ہے۔

عبادات کی قبولیت وصحت کے لیے ایمان شرط ہے، جیسے شرک وکفر سے ساری نیکیاں ضائع ہو جاتی ہیں، اور جیسے بغیر وضو کے نماز قبول نہیں ہوتی ویسے ہی بغیر ایمان کے کوئی عبادت قبول نہیں ہوتی۔ اللہ تعالی کا فرمان ہے:

﴿وَمَن يَعۡمَلۡ مِنَ ٱلصَّٰلِحَٰتِ مِن ذَكَرٍ أَوۡ أُنثَىٰ وَهُوَ مُؤۡمِنٞ فَأُوْلَٰٓئِكَ يَدۡخُلُونَ ٱلۡجَنَّةَ وَلَا يُظۡلَمُونَ نَقِيرٗا 124﴾

”جو ایمان واﻻ ہو مرد ہو یا عورت اور وه نیک اعمال کرے، یقیناً ایسے لوگ جنت میں جائیں گے اور کھجور کی گٹھلی کے شگاف برابر بھی ان کا حق نہ مارا جائے گا۔“ [النساء: 124]

اس میں یہ واضح کردیا کہ شرک عمل کو برباد کردیتا ہے، جیسا کہ اللہ تعالیٰ کا ارشاد ہے:

﴿وَلَقَدۡ أُوحِيَ إِلَيۡكَ وَإِلَى ٱلَّذِينَ مِن قَبۡلِكَ لَئِنۡ أَشۡرَكۡتَ لَيَحۡبَطَنَّ عَمَلُكَ وَلَتَكُونَنَّ مِنَ ٱلۡخَٰسِرِينَ 65﴾

"یقیناً تیری طرف بھی اور تجھ سے پہلے (کے تمام نبیوں) کی طرف بھی وحی کی گئی ہے کہ اگر تو نے شرک کیا تو بلاشبہ تیرا عمل ضائع ہو جائے گا اور بالیقین تو زیاں کاروں میں سے ہوجائے گا"۔ [الزمر: 65 ]۔

ایمان کے ارکان چھ ہیں: اللہ پر ایمان لانا، اس کے فرشتوں پر ایمان لانا، اس کی کتابوں پر ایمان لانا، اس کے رسولوں پر ایمان لانا، قیامت کے دن پر ایمان لانا اور اچھی اور بُری تقدیر پر ایمان لانا۔

1) اللہ تعالیٰ پر ایمان تین امور کو شامل ہے:

1۔ اللہ کی ربوبیت پر ایمان لانا:

یعنی اللہ تعالی کو اس کے تمام کاموں میں اکیلا ماننا؛ جیسے پیدا کرنا، روزی دینا اور موت وحیات دینا، چنانچہ اللہ تعالی کے سوا نہ کوئی خالق ہے، نہ رازق ہے، نہ زندگی دینے والا ہے‘ نہ موت دینے والا ہے اور نہ اللہ سبحانہ وتعالى کے سوا کوئی اس کائنات میں تصرف کا اختیار رکھتا ہے۔

اس جہان میں جس نے بھی اللہ پاک کی ربوبیت کا انکار کیا اس نے محض کبر وغرور کی بنا پر انکار کیا‘ دل سے اس کا عقیدہ رکھے بغیر‘ جیسا کہ فرعون کا معاملہ ہے، جب اس نے اپنی قوم سے کہا:

﴿‌...أَنَا ‌رَبُّكُمُ ‌الْأَعْلَى﴾

"... تم سب کا بڑا رب میں ہی ہوں"۔ [النازعات: 24]، جب کہ وہ اس کا عقیدہ نہیں رکھتا تھا جیسا کہ اللہ تعالی نے موسی علیہ السلام کے بارے میں فرمایا:

﴿‌قَالَ لَقَدۡ عَلِمۡتَ مَآ أَنزَلَ هَٰٓؤُلَآءِ إِلَّا رَبُّ ٱلسَّمَٰوَٰتِ وَٱلۡأَرۡضِ بَصَآئِرَ وَإِنِّي لَأَظُنُّكَ يَٰفِرۡعَوۡنُ مَثۡبُورٗا 102﴾

"موسیٰ نے جواب دیا کہ یہ تو تجھے علم ہوچکا ہے کہ آسمان وزمین کے پروردگار ہی نے یہ معجزے دکھانے، سمجھانے کو نازل فرمائے ہیں، اے فرعون! میں تو سمجھ رہا ہوں کہ تو یقیناً برباد وہلاک کیا گیا ہے"۔ [الإسراء: 102]، نیز ارشاد ربانی ہے:

﴿‌وَجَحَدُوا بِهَا وَاسْتَيْقَنَتْهَا أَنْفُسُهُمْ ظُلْمًا وَعُلُوًّا... ﴾

" انہوں نے انکار کردیا حاﻻنکہ ان کے دل یقین کر چکے تھے صرف ﻇلم اور تکبر کی بنا پر..." [النمل: 14]

کیوں کہ یہ ضروری ہے کہ ان مخلوقات کا کوئی خالق ہو، یہ نا ممکن ہے کہ انہوں نے خود ہی اپنی ذات کو وجود بخشا ہو‘ اس لیے کہ کوئی چیز خود کو نہیں پیدا کرتی اور یہ بھی ناممکن ہے کہ یہ اتفاقیہ طور پر وجود میں آجائے؛ کیوں کہ بغیر خالق کے کسی مخلوق کا کوئی تصور ہی نہیں، اور اس لیے بھی کہ ان مخلوقات کا اس بے مثال نظم ونسق کے ساتھ وجود میں آنا اس بات کے منافی ہے کہ یہ اچانک وجود میں آگئی ہوں، لہذا موجِد کا وجود حتمی ہوا۔ اور وہ اللہ رب العالمین ہے۔ اللہ تعالی کا فرمان ہے:

﴿‌أَمۡ خُلِقُواْ مِنۡ غَيۡرِ شَيۡءٍ أَمۡ هُمُ ٱلۡخَٰلِقُونَ 35 أَمۡ خَلَقُواْ ٱلسَّمَٰوَٰتِ وَٱلۡأَرۡضَۚ بَل لَّا يُوقِنُونَ 36﴾

"کیا یہ بغیر کسی (پیدا کرنے والے) کے خود بخود پیدا ہوگئے ہیں؟ یا یہ خود پیدا کرنے والے ہیں؟

کیا انہوں نے ہی آسمانوں اور زمین کو پیدا کیا ہے؟ بلکہ یہ یقین کرنے والے لوگ نہیں ہیں"۔ [الطور:35-36]۔

مشرکین اللہ تعالیٰ کی الوہیت میں شرک کرنے کے باوجود اس کی ”ربوبیت“ کا اقرار کرتے تھے، لیکن اس سے وہ اسلام میں داخل نہیں ہوئے، بلکہ نبی ﷺ نے ان سے جنگ کی اور ان کے خون اور مال کو حلال سمجھا؛ کیوں کہ انہوں نے عبادت میں شرک کیا، اللہ کے ساتھ بتوں، پتھروں اور فرشتوں وغیرہ کی عبادت کی۔

2 ۔ اللہ کی الوہیت پر ایمان:

اس سے مراد یہ ہے کہ صرف اللہ تعالی ہی سچا معبود ہے اس کا کوئی شریک نہیں، لفظ الہ کے معنی مألوہ کے ہیں، یعنی معبود؛ جس کی عبادت محبت، تعظیم اور انکساری کے ساتھ کی جائے۔

اللہ تعالی کا فرمان ہے:

﴿‌وَإِلَٰهُكُمۡ إِلَٰهٞ وَٰحِدٞۖ لَّآ إِلَٰهَ إِلَّا هُوَ ٱلرَّحۡمَٰنُ ٱلرَّحِيمُ 163﴾

”تم سب کا معبود ایک ہی معبود ہے، اس کے سوا کوئی معبود برحق نہیں وه بہت رحم کرنے واﻻ اور بڑا مہربان ہے۔“ [البقرة: 163]۔

اور اللہ تعالیٰ کے ساتھ جس کسی کو معبود بنا کر پوجا گیا اس کی الوہیت غلط اور باطل ہے۔ اللہ تعالی کا فرمان ہے:

﴿ذَٰلِكَ بِأَنَّ ٱللَّهَ هُوَ ٱلۡحَقُّ وَأَنَّ مَا يَدۡعُونَ مِن دُونِهِۦ هُوَ ٱلۡبَٰطِلُ وَأَنَّ ٱللَّهَ هُوَ ٱلۡعَلِيُّ ٱلۡكَبِيرُ 62﴾

"یہ اس لیے کہ بے شک الله ہی حق ہے اور اللہ تعالی کے سوا (کافر) جس کو پکارتے ہیں وہ باطل ہے اور اللہ ہی بلندی والا اور کبریائی والا ہے"۔ [الحج: 62]۔

یہی وجہ ہے کہ نوح علیہ السلام سے محمد ﷺ تک سارے رسول اپنی قوموں کو توحید اور صرف اللہ کی عبادت کی دعوت دیتے تھے، اور مشرکین جو اللہ تعالی کو چھوڑ کر غیروں کی عبادت کرتے ہیں، ان سے فریاد کرتے اور مدد ماںگتے ہیں، اسے اللہ تعالی نے دو عقلی دلیلوں سے باطل ثابت کیا ہے:

پہلی دلیل: جن کو ان لوگوں نے الہ (معبود) بنا رکھا ہے ان میں ”الوہیت“ کی صفات نہیں پائی جاتیں بلکہ وہ خود مخلوق ہیں، کسی بھی چیز کو پیدا کرنا ان کے بس میں نہیں، وہ اپنی پرستش کرنے والوں کو نہ کوئی نفع پہنچا سکتے ہیں اور نہ ان کی کوئی تکلیف دور کر سکتے ہیں‘ نہ وہ زندگی کے مالک ہیں اور نہ موت کے اور نہ ہی دو بارہ زندہ کرنے کے۔ جیسا کہ اللہ تعالیٰ کا ارشاد ہے:

﴿وَٱتَّخَذُواْ مِن دُونِهِۦٓ ءَالِهَةٗ لَّا يَخۡلُقُونَ شَيۡـٔٗا وَهُمۡ يُخۡلَقُونَ وَلَا يَمۡلِكُونَ لِأَنفُسِهِمۡ ضَرّٗا وَلَا نَفۡعٗا وَلَا يَمۡلِكُونَ مَوۡتٗا وَلَا حَيَوٰةٗ وَلَا نُشُورٗا 3﴾

ان لوگوں نے اللہ کے سوا جنہیں اپنے معبود ٹھہرا رکھے ہیں وه کسی چیز کو پیدا نہیں کرسکتے بلکہ وه خود پیدا کئے جاتے ہیں، یہ تو اپنی جان کے نقصان نفع کا بھی اختیارنہیں رکھتے اور نہ موت وحیات کے اور نہ دوباره جی اٹھنے کے وه مالک ہیں"۔ [الفرقان: 3]

دوسری دلیل: یہ مشرکین تسلیم کرتے تھے کہ اللہ تعالی ہی اکیلا خالق اور مدبر ہے اور اس کا لازمی تقاضا یہ ہے کہ وہ اللہ تعالی کو جس طرح ربوبیت میں واحد مانتے ہیں اسی طرح الوہیت میں بھی اکیلا جانیں۔ جیسا کہ اللہ تعالیٰ کا ارشاد ہے:

﴿قُل لِّمَنِ ٱلۡأَرۡضُ وَمَن فِيهَآ إِن كُنتُمۡ تَعۡلَمُونَ 84 سَيَقُولُونَ لِلَّهِۚ قُلۡ أَفَلَا تَذَكَّرُونَ 85 قُلۡ مَن رَّبُّ ٱلسَّمَٰوَٰتِ ٱلسَّبۡعِ وَرَبُّ ٱلۡعَرۡشِ ٱلۡعَظِيمِ 86 سَيَقُولُونَ لِلَّهِۚ قُلۡ أَفَلَا تَتَّقُونَ 87 قُلْ مَنْ بِيَدِهِ مَلَكُوتُ كُلِّ شَيْءٍ وَهُوَ يُجِيرُ وَلَا يُجَارُ عَلَيْهِ إِنْ كُنْتُمْ تَعْلَمُونَ 88 سَيَقُولُونَ لِلَّهِ قُلْ فَأَنَّى تُسْحَرُونَ 89﴾

"پوچھیئے تو سہی کہ زمین اور اس کی کل چیزیں کس کی ہیں؟ بتلاؤ اگر جانتے ہو؟

وہ فوراً جواب دیں گے کہ اللہ کی، کہہ دیجیئے کہ پھر تم نصیحت کیوں نہیں حاصل کرتے۔

دریافت کیجیئے کہ ساتوں آسمان کا اور بہت با عظمت عرش کا رب کون ہے؟

وہ ضرور یہی کہیں گے کہ اللہ۔ کہو پھر تم اس سے کیوں نہیں ڈرتے۔

پوچھیے کہ تمام چیزوں کا اختیار کس کے ہاتھ میں ہے؟ جو پناه دیتا ہے اور جس کے مقابلے میں کوئی پناه نہیں دیا جاتا، اگر تم جانتے ہو تو بتلا دو؟

وہ ضرور یہی کہیں گے کہ اللہ ، کہو پھر تم کدھر سے جادو کر دیئے جاتے ہو؟"۔ [المؤمنون: 84- 89] جب انہوں نے توحید ربوبیت کا اقرار کیا تو اس کا لازمی تقاضا یہ ہے کہ وہ صرف اسی کی عبادت کریں اور اس کی عبادت میں کسی کو شریک نہ ٹھہرائیں۔

3 ۔ اسما وصفات پر ایمان:

یعنی اللہ کے لیے ان اسما وصفات کو ثابت کرنا جنھیں اللہ نے اپنے لیے اپنی کتاب میں ثابت کیا ہے یا رسول اللہ ﷺ نے اللہ کے لیے اپنی احادیث میں ثابت کیا ہے؛ اسی طرح جس طرح اس کے شایانِ شان ہو، بغیر کسی تحریف، تعطیل، تکییف اور تمثیل کے، اللہ تعالی کا فرمان ہے:

﴿‌وَلِلَّهِ ٱلۡأَسۡمَآءُ ٱلۡحُسۡنَىٰ فَٱدۡعُوهُ بِهَاۖ وَذَرُواْ ٱلَّذِينَ يُلۡحِدُونَ فِيٓ أَسۡمَٰٓئِهِۦۚ سَيُجۡزَوۡنَ مَا كَانُواْ يَعۡمَلُونَ 180﴾

" اور اللہ کے اچھے نام ہیں، سو تم اللہ کو انھی ناموں کے ساتھ پکارو، اور ایسے لوگوں سے تعلق ہی نہ رکھو جو اس کے ناموں میں کج روی کرتے ہیں، ان لوگوں کو ان کے کیے کی ضرور سزا ملے گی"۔ [الأعراف: 180] ارشاد ربانی ہے:

﴿‌...لَيۡسَ كَمِثۡلِهِۦ شَيۡءٞۖ وَهُوَ ٱلسَّمِيعُ ٱلۡبَصِيرُ﴾

" ...اس جیسی کوئی چیز نہیں وه سننے اور دیکھنے واﻻ ہے"۔ [الشوریٰ: 11]

شرک کی تین قسمیں:

1۔ شرک اکبر۔

2۔ شرکِ اصغر۔

3۔ شرک خفی۔

1۔ شرک اکبر:

اس کا ضابطہ ہے: اللہ تعالی کی خصوصیات میں غیر اللہ کو اس کے مساوی قرار دینا، جیسا کہ اللہ تعالیٰ کا ارشاد ہے:

﴿‌إِذۡ نُسَوِّيكُم بِرَبِّ ٱلۡعَٰلَمِينَ 98﴾

"جب ہم تمہیں رب العالمین کے برابر سمجھ بیٹھے تھے"۔ [الشعراء: 98]۔

اور اسى کے ضمن میں آتا ہے: غیر اللہ کے لیے عبادت کو انجام دینا، یا کسی عبادت کو اللہ کے علاوہ کسی اور کے لیے انجام دینا؛ جیسے دعا، فریاد، نذر اور ذبح وغیرہ جیسی عبادتیں۔

یا اللہ تعالی کی حرام کردہ چیز کو حلال سمجھنا، یا اللہ کی حلال کردہ چیز کو حرام قرار دینا، یا اللہ کے واجب کردہ امور کو ساقط کرنا، مثال کے طور پر جس چیز کی حرمت دین میں قطعی طور پر معلوم ہو، اُسے حلال سمجھنا؛ جیسے زنا، شراب، والدین کی نافرمانی، یا سود یا اس جیسے دیگر حرام امور کو حلال سمجھنا۔

یا اللہ تعالی کی حلال کردہ پاکیزہ چیزوں کو حرام قرار دینا، یا کسی واجب کو ساقط کر دینا، مثلا یہ عقیدہ رکھنا کہ نماز، روزہ یا زکوۃ واجب نہیں ہے۔

شرک اکبر کی حالت میں فوت ہونے والے شخص کے عمل کو یہ شرک غارت کردیتا ہے اور اس کے لیے جہنم کی دائمی زندگی کا موجب ہوتا ہے۔ جیسا کہ اللہ تعالیٰ کا ارشاد ہے:

﴿‌...وَلَوۡ أَشۡرَكُواْ لَحَبِطَ عَنۡهُم مَّا كَانُواْ يَعۡمَلُونَ﴾

"... اور اگر فرضاً یہ حضرات بھی شرک کرتے تو جو کچھ یہ اعمال کرتے تھے وه سب اکارت ہوجاتے"۔ [الأنعام: 88]۔

جو شخص اس حالت میں مرے گا اللہ اس کو ہرگز معاف نہیں کرے گا اور اس پر جنت حرام ہے، جیسا کہ اللہ تعالیٰ کا ارشاد ہے:

﴿‌إِنَّ ٱللَّهَ لَا يَغۡفِرُ أَن يُشۡرَكَ بِهِۦ وَيَغۡفِرُ مَا دُونَ ذَٰلِكَ لِمَن يَشَآءُ...﴾

" یقیناً اللہ تعالیٰ اپنے ساتھ شریک کئے جانے کو نہیں بخشتا اور اس کے سوا جس کے لئے چاہتا ہے بخش دیتا ہے..." [النساء: 48]، نیز فرمان باری تعالی ہے:

﴿إِنَّهُۥ مَن يُشۡرِكۡ بِٱللَّهِ فَقَدۡ حَرَّمَ ٱللَّهُ عَلَيۡهِ ٱلۡجَنَّةَ وَمَأۡوَىٰهُ ٱلنَّارُ...﴾

"یقین مانو کہ جو شخص اللہ کے ساتھ شریک کرتا ہے اللہ تعالیٰ نے اس پر جنت حرام کر دی ہے، اس کا ٹھکانہ جہنم ہی ہے..." [المائدۃ: 72]۔

2۔ شرکِ اصغر:

جسے نصوص میں شرک قرار دیا گیا ہو لیکن وہ شرک اکبر کے درجہ تک نہ پہنچتا ہو تو اسے شرک اصغر کہا جاتا ہے؛ جیسے غیر اللہ کی قسم کھانا؛ مثلا کعبہ، انبیا، امانت اور کسی کی زندگی وغیرہ کی قسم کھانا، جیسا کہ اللہ کے رسول ﷺ نے ارشاد فرمایا: «مَنْ حَلَفَ بِغَيرِ اللهِ فَقَدْ كَفَرَ أَو أَشرَكَ». ”جس شخص نے غیر اللہ کی قسم کھائی تو اس نے کفر کیا یا شرک کیا“²۔

اور اعتقادِ قلب کے بموجب شرک اصغر بسا اوقات شرک اکبر ہو جاتا ہے، چنانچہ نبی یا کسی شیخ کی قسم کھانے والا اگر یہ عقیدہ رکھے کہ وہ اللہ کے مثل ہے، یا اسے اللہ کو چھوڑ کر پکارا جا سکتا ہے یا تدبیر کائنات میں اس کو اختیار ہے تو یہ شرک اکبر ہو جائے گا۔ لیکن اگر ایسا کوئی عقیدہ نہ ہو بلکہ محض عادت کے بموجب اس کی زبان سے ایسا نکل گیا ہو تو وہ شرک اصغر ہوگا۔ اور ایسا بہت ہوتا ہے اس لیے حفاظتِ توحید کی خاطر اس سے ہوشیار رہنا اور خبر دار کرنا ضروری ہے۔

3۔ شرک خفی:

اس سے مراد دلوں کی ریاکاری ہے؛ جیسے کوئی ریاکاری کے لیے نماز پڑھے، قرآن پڑھے، تسبیح کرے یا صدقہ دے کہ لوگ اس کی تعریف کریں، اس سے وہ عمل اکارت ہو جاتا ہے جس میں اس نے ریاکاری کی، البتہ وہ اعمال جنہیں اللہ تعالی کے لئے خالص کیا ہو‘ وہ برباد نہیں ہوتے۔

اللہ کے نبی ﷺ نے فرمایا ہے: «الشِّرْكُ فِي هَذِهِ الْأُمَّةِ أَخْفَى مِنْ دَبِيبِ النَّمْلَةِ السَّودَاءِ عَلَى الصَّفَاةِ السَّودَاءِ فِي ظُلْمَةِ اللَّيْلِ، وَكَفَّارَتُهُ أَنْ يَقُولَ: "اللَّهُمَّ إِنِّي أَعُوذُ بِكَ أَنْ أُشْرِكَ بِكَ شَيْئًا وَأَنَا أَعْلَمُ، وَأَسْتَغْفِرُكَ مِنَ الذَّنْبِ الَّذِي لَا أَعْلَمُ». "اس امت میں شرک رات کی تاریکی میں سیاہ پتھر پر کالی چیونٹی کی سرسراہٹ سے بھی زیادہ پوشیدہ ہے، اور اس کا کفارہ یہ کہنا ہے: اے اللہ میں اس بات سے پناہ مانگتا ہوں کہ دانستہ طور پر تیرے ساتھ شرک کروں اور تجھ سے اس گناہ کی معافی مانگتا ہوں جو نا دانستہ طور پر ہو۔"³

کفر کے اقسام:

پہلی قسم: کفر اکبر:

کفر اکبر‘ ہمیشہ کے لیے جہنم کی زندگی کو واجب کردیتا ہے اور اس کی پانچ قسمیں ہیں:

1۔ کفرِ تکذیب:

یہ ہے رسولوں کو جھوٹا ماننے کا عقیدہ رکھنا، کافروں میں یہ کفر بہت نادر ہے؛ کیوں کہ اللہ تعالی نے اپنے رسولوں کو روشن دلیلیں عطا کی تھیں، ان تکذیب کرنے والوں کا حال بالكل ويسا ہى تھا جیسا کہ اللہ تعالی نے بیان کیا ہے:

﴿‌وَجَحَدُوا ‌بِهَا ‌وَاسْتَيْقَنَتْهَا أَنْفُسُهُمْ ظُلْمًا وَعُلُوًّا...﴾

"انہوں نے انکار کردیا حاﻻنکہ ان کے دل یقین کر چکے تھے‘ صرف ﻇلم اور تکبر کی بنا پر..." [النحل: 14]

2 ۔ تکبر اور روگردانی کا کفر:

جیسے ابلیس کا کفر؛ اس نے اللہ کے حکم کا انکار تو نہیں کیا تھا لیکن اس کے سامنے تکبر اور روگردانی کا اظہار کیا تھا۔ اللہ تعالی کا فرمان ہے:

﴿وَإِذۡ قُلۡنَا لِلۡمَلَٰٓئِكَةِ ٱسۡجُدُواْ لِأٓدَمَ فَسَجَدُوٓاْ إِلَّآ إِبۡلِيسَ أَبَىٰ وَٱسۡتَكۡبَرَ وَكَانَ مِنَ ٱلۡكَٰفِرِينَ 34﴾

" اور جب ہم نے فرشتوں سے کہا کہ آدم کو سجده کرو تو ابلیس کے سوا سب نے سجده کیا۔ اس نے انکار کیا اور تکبر کیا اور وه کافروں میں ہوگیا"۔ [البقرۃ: 34]

3 ۔ کفر اعراض:

وہ یہ ہے کہ اپنے کان اور دل کو حق کی پیروی سے موڑ لے، نہ اس کی طرف توجہ دے اور نہ اسے کوئی اہمیت دے۔ اللہ تعالی کا فرمان ہے:

﴿وَمَنۡ أَظۡلَمُ مِمَّن ذُكِّرَ بِـَٔايَٰتِ رَبِّهِۦ ثُمَّ أَعۡرَضَ عَنۡهَآۚ إِنَّا مِنَ ٱلۡمُجۡرِمِينَ مُنتَقِمُونَ 22﴾

"اس سے بڑھ کر ظالم کون ہے جسے اللہ تعالیٰ کی آیتوں سے وعظ کیا گیا پھر بھی اس نے ان سے منھ پھیر لیا، (یقین مانو) کہ ہم بھی گناه گاروں سے انتقام لینے والے ہیں"۔ [السجدة: 22]۔

لیکن اگر اعراض وبے توجہى صرف جزئى طور پر ہو تو صرف فسق ہوگا کفر کے درجہ کو نہیں پہنچے گا، جیسے اگر کوئی شخص دین کے بعض واجبات کو سیکھنے سے اعراض برتے جیسے روزے اور حج کے احکام وغیرہ۔

4 ۔ کفر شک:

وہ یہ ہے کہ بندہ حق کے سلسلہ میں تردد اور شک کا شکار ہو، جیسا کہ اللہ تعالی نے فرمایا:

﴿وَدَخَلَ جَنَّتَهُ وَهُوَ ظَالِمٌ لِنَفْسِهِ قَالَ مَا أَظُنُّ أَنْ تَبِيدَ هَذِهِ أَبَدًا35 وَمَا أَظُنُّ السَّاعَةَ قَائِمَةً وَلَئِنْ رُدِدْتُ إِلَى رَبِّي لَأَجِدَنَّ خَيْرًا مِنْهَا مُنْقَلَبًا 36﴾

"اور وہ اپنے باغ میں گیا اور وہ تھا اپنی جان پر ظلم کرنے والا، کہنے لگا میں خیال نہیں کر سکتا کہ یہ کبھی برباد ہو جائے گا۔

اور نہ میں قیامت کو قائم ہونے والی خیال کرتا ہوں اور اگر (بالفرض) میں اپنے رب کی طرف لوٹایا بھی گیا تو یقیناً میں (اس لوٹنے کی جگہ کو) اس سے بھی زیاده بہتر پاؤں گا"۔ [الكهف: 35 - 36 ]۔

5 ۔ کفر نفاق:

وہ یہ ہے کہ انسان زبان سے تو ایمان کا دعوا کرے مگر دل میں اس جھوٹ چھپا کر رکھے۔ اللہ تعالی کا فرمان ہے:

﴿وَمِنَ ٱلنَّاسِ مَن يَقُولُ ءَامَنَّا بِٱللَّهِ وَبِٱلۡيَوۡمِ ٱلۡأٓخِرِ وَمَا هُم بِمُؤۡمِنِينَ 8﴾

"بعض لوگ کہتے ہیں کہ ہم اللہ تعالیٰ پر اور قیامت کے دن پر ایمان رکھتے ہیں، لیکن درحقیقت وه ایمان والے نہیں ہیں"۔ [البقرۃ: 8‎]۔

یہ ہیں کفر اکبر کی قسمیں جو دین اسلام سے خارج کر دیتی ہیں۔

دوسری قسم: کفر اصغر:

اس کفر کی وجہ سے کوئی ہمیشہ جہنم میں نہیں رہے گا۔ اس کفر کے ضمن میں وہ ساری چیزیں آتی ہیں جن کی بابت شریعت میں لفظ کفر کا استعمال بغیرالف لام کے حالت نکرہ میں ہوا ہو۔ اس کی متعدد مثالیں ہیں، جن میں سے چند یہ ہیں: ابو ہریرہ رضی اللہ عنہ کی حدیث ہے کہ رسول اللہ ﷺ نے فرمایا: «اثْنَتَانِ فِي النَّاسِ هُمَا بِهِمْ كُفْرٌ: الطَّعْنُ فِي النَّسَبِ، وَالنِّيَاحَةُ عَلَى المَيِّتِ». " لوگوں میں دو چیزیں کفر ہیں: نسب پر طعن کرنا اور میت پر نوحہ کرنا"۔⁴.

2) فرشتوں پر ایمان:

فرشتوں کا تعلق عالم غیب سے ہے، اللہ تعالی نے انہیں نور سے پیدا کیا ہے۔ وہ سب اللہ کی عبادت کرنے والے ہیں، ان میں ربوبیت یا الوہیت کی کوئی خاصیت نہیں ہے، وہ اللہ کے حکم کی خلاف ورزی نہیں کرتے، بلکہ اللہ کے ہر حکم کی تعمیل کرتے ہیں، ان کی تعداد بہت زیادہ ہے، جس کا علم اللہ تعالی کے سوا کسی کو نہیں ہے۔

فرشتوں پر ایمان چار چیزوں کو شامل ہے:

(1) فرشتوں کے وجود پر ایمان۔

(2) ان فرشتوں پر ایمان لانا جن کے نام ہمیں معلوم ہیں، جیسے جبریل، میکائیل، اسرافیل وغیرہ۔ اور جن کے نام نہیں معلوم ہیں ان پر بھی اجمالی طور پر ایمان رکھنا۔

(3) ان کی ان صفات پر ایمان رکھنا جو کتاب وسنت میں وارد ہوئی ہیں؛ جیسے اللہ کے رسول ﷺ نے جبرائیل علیہ السلام کے بارے میں فرمایا کہ آپ نے انہیں ان کی حقیقی خلقت میں دیکھا‘ ان کے چھ سو پر تھے جن سے افقِ آسمان ڈھک چکا تھا۔

(4) فرشتوں کے ان اعمال پر ایمان لانا جو ہمیں معلوم ہیں؛ جیسے اللہ تعالیٰ کی تسبیح کرنا اور دن رات بلا کسی تھکاوٹ اور اکتاہٹ کے اس کی عبادت میں مشغول رہنا،

مثلاً: جبریل: وحی کے امین ہیں،

اسرافیل علیہ السلام صور پھونکنے پر مقرر ہیں۔

ملک الموت‘ موت کے وقت روح قبض کرنے پر مامور ہیں۔

مالک‘ جہنم کا داروغہ اور رضوان‘ جنت کا رکھوالا ہے، اس طرح دیگر وہ تمام فرشتے جن کے کام معلوم ہیں‘ ان پر ایمان رکھنا۔

3) کتابوں پر ایمان:

کتابوں سے مراد وہ آسمانی کتابیں ہیں جو اللہ تعالی نے اپنے رسولوں پر نازل کیں، انسانوں کی ہدایت اور ان پر رحم وکرم کا معاملہ کرتے ہوئے، تاکہ انہیں دونوں جہان کی سعادت نصیب ہو۔

کتابوں پر ایمان چار امور کو شامل ہے:

1- اس بات پر ایمان کہ ان کا اللہ تعالیٰ کی جانب سے نازل ہونا حق ہے۔

2- جن کتابوں کے نام معلوم ہیں ان پر ایمان رکھنا؛ جیسے قرآن جو محمد ﷺ پر نازل ہوا، تورات جو موسی علیہ السلام پر نازل ہوئی، انجیل جو عیسی علیہ السلام پر نازل ہوئی، اور زبور جو داود علیہ السلام کو عطا کی گئی۔

اور جن کتابوں کے نام نہیں معلوم ہیں ان پر بھی اجمالی طور پے ایمان رکھنا۔

3- ان میں وارد خبروں کی تصدیق؛ جیسے قرآن اور غیر محرف سابقہ کتابوں کی خبریں۔

4- ان کتابوں کے ان جملہ احکام پر برضا ورغبت عمل کرنا جو منسوخ نہیں ہوئے، خواہ ہم ان احکام کی حکمت کا ادراک کر سکے ہوں، یا ہم اس سے قاصر رہے ہوں۔ یاد رہے کہ سابقہ تمام کتابیں قرآن کریم کے ذریعہ منسوخ ہو چکی ہیں۔ لہذا پہلی کتابوں کے کسی حکم پر عمل کرنا جائز نہیں ہے الا یہ کہ وہ صحت کے درجہ کو پہنچ جائے اور قرآن کریم یا سنت نبوی نے اسے برقرار رکھا ہو۔

4) رسولوں علیہم السلام پر ایمان لانا:

رُسُل: رسول کی جمع ہے؛ اور یہ وہ عظیم انسان ہیں جن کی طرف بذریعہ وحی شریعت نازل کی گئی اور انہیں اس کی تبلیغ کا حکم دیا گیا۔ سب سے پہلے رسول حضرت نوح علیہ السلام اور آخری رسول حضرت محمد ﷺ ہیں۔ وہ بشر اور مخلوق ہیں، ان میں ربوبیت یا الوہیت کی کوئی خصوصیت نہیں ہے۔

رسولوں پر ایمان مندرجہ ذیل باتوں کو شامل ہے:

1- اس بات پر ایمان کہ ان کی رسالت اللہ کی جانب سے حق ہے، لہذا جو شخص ان میں سے کسی ایک کی رسالت کا انکار کرے گا وہ تمام رسولوں کا منکر ہوگا۔

2- ان رسولوں پر ایمان لانا جن کے نام ہمیں معلوم ہیں، مثلا محمدﷺ، ابراہیم، موسی، عیسی اور نوح علیھم الصلاۃ والسلام ۔ ان پانچوں اولو العزم رسول ہیں۔

جن انبیاء کرام علیھم السلام کے اسمائے گرامی کا ہمیں علم نہیں ان پر بھی اجمالا ایمان لانا ہم پر لازم ہے۔ اللہ تعالی کا فرمان ہے:

﴿‌وَلَقَدۡ أَرۡسَلۡنَا رُسُلٗا مِّن قَبۡلِكَ مِنۡهُم مَّن قَصَصۡنَا عَلَيۡكَ وَمِنۡهُم مَّن لَّمۡ نَقۡصُصۡ عَلَيۡكَ...﴾

" یقیناً ہم آپ سے پہلے بھی بہت سے رسول بھیج چکے ہیں جن میں سے بعض کے (واقعات) ہم آپ کو بیان کر چکے ہیں اور ان میں سے بعض کے (قصے) تو ہم نے آپ کو بیان ہی نہیں کیے..." [سورۃ غافر: 78]۔

3- ان کی جو خبریں صحیح اور ثابت ہیں‘ ان کی تصدیق کرنا۔

4- خاتم النبیین محمد ﷺ کی شریعت پر عمل کرنا۔

5) یومِ آخرت پر ایمان:

”یوم آخرت“ سے مراد روز قیامت ہے، جب لوگوں کو ان کے اعمال کے حساب اور جزا کے لیے دوبارہ اٹھایا جائے گا۔ اس دن کا نام ”یوم آخرت“ اس لیے ہے کہ اس کے بعد کوئی دوسرا دن نہیں ہوگا، کیوںکہ تمام اہل جنت اور اہل جہنم اپنے اپنے ٹھکانوں میں قرار پا جائیں گے۔

آخرت کے دن پر ایمان تین امور کو شامل ہے:

ا- بعث پر ایمان:

یعنی جب صور میں دوسری پھونک ماری جائے گی تو سارے مردے زندہ ہو کر اٹھ کھڑے ہوں گے، سارے لوگ رب العالمین کے لیے کھڑے ہوں گے، نہ ان کے پیروں میں جوتے ہوں گے اور نہ بدن پہ کپڑے اور سب بغیر ختنہ کے ہوں گے۔ اللہ تعالی کا فرمان ہے:

﴿كَمَا بَدَأْنَا أَوَّلَ خَلْقٍ نُعِيدُهُ ‌وَعْدًا ‌عَلَيْنَا إِنَّا كُنَّا فَاعِلِينَ 104﴾

"جیسے کہ ہم نے اول دفعہ پیدائش کی تھی اسی طرح دوباره کریں گے۔ یہ ہمارے ذمے وعده ہے اور ہم اسے ضرور کر کے (ہی) رہیں گے"۔ [الانبیاء: 104]

ب- حساب وجزا پر ایمان:

جب بندہ کے اعمال کا حساب ہوگا اور اسے ان کا بدلہ دیا جائے گا، اللہ تعالی کا فرمان ہے:

﴿إِنَّ إِلَيۡنَآ إِيَابَهُمۡ 25 ثُمَّ إِنَّ عَلَيۡنَا حِسَابَهُم 26﴾

" بیشک ہماری طرف ان کا لوٹنا ہے۔

پھر بیشک ہمارے ذمہ ہے ان سے حساب لینا". [الغاشیۃ: 25-26]

ج- جنت اور جہنم پہ ایمان:

اور اس بات پہ ایمان کہ یہ دونوں بندوں کے دائمی ٹھکانہ ہیں؛ جنت نعمتوں کا ٹھکانہ ہے جسے اللہ تعالیٰ نے پرہیزگار مومنوں اور اللہ اور اس کے رسول ﷺ کی اطاعت کرنے والوں کے لیے تیار کیا ہے۔ اس میں ایسی نعمتیں ہیں جنہیں نہ کسی کی آنکھ نے دیکھا، نہ کانوں نے سنا اور نہ کبھی کسی انسان کے دل میں ان کا خیال ہی گزرا۔

اور جہنم؛ جائے سزا ہے، جسے اللہ تعالی نے کافروں اور نافرمانوں کے لیے تیار کیا ہے۔ اس کی متنوع سزاؤں کا تصور بھی ممکن نہیں۔

6) اچھی اور بری تقدیر پر ایمان: