Mɛi yá nà Anduniya hàliita ? Mɛi yá nà hɛ̄i bɔ̀ŋɔ̄ hàliita ? Ifɔ gànna ? - Dendi

PHPWord

مَنْ خَلَقَ الكَونَ؟ وَمَنْ خَلَقَنِي؟ وَلِمَاذَا؟

Mɛi yá nà Anduniya hàliita? Mɛi yá nà hɛ̄i bɔ̀ŋɔ̄ hàliita ? Ifɔ gànna ?

اللَّجْنَةُ العِلْمِيَّةُ

بِرِئَاسَةِ الشُّؤُونِ الدِّينِيَّةِ بِالمَسْجِدِ الحَرَامِ وَالمَسْجِدِ النَّبَوِيِّ

بِسْمِ اللهِ الرَّحمَنِ الرَّحِيمِ

Mɛi yá nà Anduniya hàliita? Mɛi yá nà hɛ̄i bɔ̀ŋɔ̄ hàliita ? Ifɔ gànna ?

Beiyo ŋmɛnɛ Igbɛ ká ǎ latìyo nna Àdiini Sénni tɛyo Bɔ̀nŋɔ̀tɛ̀rɛ Kǎba Jìnjire nna Andebi Jìnjire ŋmɛnɛ

Áyara hɛ̄i a gono hini deidei bɔnŋɔ̀ ?

Mɛi yá nà samayo hàliita nna gannā nna hàikáayo ǹ gono ǹ kuna zǎ hàliita bèerì bèerìyo káayo ǹ su gu ǹ bei ka kɔɔli ?

Mɛi yá nà siriya cirici wɔ̀ ká à bòoriyoo jaasayo koo kùbeyo tɛ sama nna gannā kuna ?

Mɛi yá nà bɔ̀rɔ hàliita ka yēi ka à gòmìnì mãyo nna diyayo nna laakali, ka yēi ka nam à gonna beiyo duuri nna cimiyo beiyo ŋmɛnɛ yiiko ?

Mɛi yá sinti ka gbei cirici wɔ̀ tɛ nna Gonìntàtɛ̀rɛ n gáa dɔbuyo kuna , ka n foto tɛ ka n foto di yassi boriyanī ?

N mà nùura yéeti hàliita hùndèkòniyo ga nna ká ǹ bara dimi ŋmàanī ŋmàanī koo bara mɔ̀ɔ ŋmàanī ŋmàanī , Mɛi yá nà ǹ hàliita Gònìntàtɛ̀rɛ bɔ̀nŋɔ̀ nna hɔnnɛyo zakāyo káayo ǹ sinna tikì ?

Mɛtɛ Anduniya bèerì wɔ̌ tɛ koo gonoyo koo siriyayo nna sariyayo káayo ǹ gu à (dìrau) sasawaniyo deidei sasawaniyo cirici jiiri jiiri tùutuumyo káayo ň bisa kuna ?

Mɛi yá nà siriyayo káayo ň dira nna Anduniya wɔ̀ kulu jìsi (hunayo nna buyo, hùndèkòniyo ŋmɛnɛ cɛ̀rɛ hɛi hɛiyo, ciini nna zaari, hàyàyo sáayo bɛ̀rɛ bɛrɛyo, ka kpee hari à mɛɛ ) ?

Áyara Anduniya wɔ̀ nà à bɔ̀ŋɔ̄ hàliita nɔ̀ ? Dě à kà nɔ̀ zǎ zam ka gono kuna? Dě à de kà ka gono nɔ̀ jirise bɔ̀nŋɔ̀ ? Irikpɛ Ká Ǎ Beeriyo cì :

﴿‌أَمۡ خُلِقُواْ مِنۡ غَيۡرِ شَيۡءٍ أَمۡ هُمُ ٱلۡخَٰلِقُونَ٣٥ أَمۡ خَلَقُواْ ٱلسَّمَٰوَٰتِ وَٱلۡأَرۡضَۚ بَل لَّا يُوقِنُونَ36﴾

﴾Áyara ǹ nà ǹ hàliita nɔ̀ ká à na bara Hàlìitàkpɛ fɔ gono ǹ sɛ ? Dě du ka nŋayo yǎ bara ǹ bɔ̀ŋɔ̄ɔyo hàlìitàkpɛɛyo ? 35

Dě binɛ nŋayo yá nà samayo nna gannā hàliita? Nŋa di kulu nàm , ǹ de bara ká ǹ suu naanɛ (cimmanīyo ŋmɛnɛ) nɔ̀ 36 ﴿‌ [At-Tuur : 35 - 36].

Dě iri na iri bɔ̀ŋɔ̄ɔyo hàliita, nŋa à suu tɛ̀ à 'n bara ká iri hunu kitɛ nɔ̀ zǎ kɔ̀ɔnu kuna aw jirise bɔ̀nŋɔ̀, dě ya nɔ̀ ni, cimi ká sika si à kuna nɔ̀ : ká anduniya wɔ̀ himā à 'n bara ká à gonna Hàlìitàkpɛ Bèerì fɔ nɔ̀ , Yiikokpɛ ; domi à suu tɛ̀ à 'n bara anduniya wɔ̀ nà à bɔ̀ŋɔ̄ hàliita ! aw à 'n hunu kitɛ zǎ zam ka gono kuna ! aw binɛ à 'n bara à kà nɔ̀ jirise bɔ̀nŋɔ̀ !

Ifɔ gànna nɔ̀ bɔ̀rɔ̌ cimi nɔ hàifɔyo káayo à suu diya ǹla gonoyo sɛ ? Sàsàwànì : (beiyo, nna lǎakali, nna hunde, nna hunde ŋmɛnɛ hàifɔ mãyo, nna bāayo), à na ci ká ǎ diya ǹ ŋmɛnɛ sědayo gànna ba ? Ka à bara ya ni, ifɔ gànna nɔ̀ bɔ̀rɔ̌ anduniya bèeri wɔ̀ Hàlìitàkpɛ Gonoyo kakāu, à dù koo diya À hàliitayo, nna À gbeiyo, nna À sisibi mãyo ŋmɛnɛ sědayo ?!

Bɔ̀rɔ̀ làakàlìntɛ fɔ suu tùtu ǹ mà cì à sɛ : fū wɔ̀ kà nɔ̀ ka na bara ká bɔ̀rɔ̀ fɔ yá nà à cini ! aw binɛ ǹ mà cì à sɛ : zam ka gono (kɔ̀ɔnu) yá nam fū wɔ̀ gono ! Dě ya nɔ̀, mɛtɛ bɔ̀rɔ̀ fɔyoo tɛ koo warka ǎ cì : anduniya bèerì wɔ̀ kà nɔ̀ ka na bara zǎ Hàlìitàkpɛ fɔ dɔ cimmanī ?! Mɛtɛ làakàlìntɛ ba tɛ ka tùtu ǹ mà cì à sɛ : anduniya siriya cirici sàwàntɛ wɔ̀ kà nɔ̀ jirise bɔ̀nŋɔ ?

Hàiyo wɔ̀ kulu gu iri tɔyani cìnɛ̀ gùrè fɔ ga nɔ̀, nŋa nɔ̀ ká anduniya wɔ̀ gonna Nɔrukpɛ Bèeri, Yiikokpɛ, à hài kulu Bɛ̀rɛ̀ Bɛ̀rɛ̀kpɛ , nna kpɛɛnɛ ká Kpei Di Fɔlɔnku yá hìmāayo nna ǹ mà bɔ̀ɔta ŋmaa À sɛ, ya nɔ̀ hɛaika kulu sɛ ň bɔ̀ɔta ŋmaa À Kpèitɛ̀rɛ baasi, bɔ̀ɔta ŋmaayo di bara kɔ̀ɔnu nɔ̀, nŋa kpɛɛ di suu hìmāayo nna ǹ mà à bɔ̀ɔta .

Nɔrukpɛ nɔ̀ Hàlìitàkpɛ Bèeri

Nɔrukpɛ, Hàlìitàkpɛ Gùrè fɔ yá gono, Nŋa yá bara Mɛ̀ikpɛ, hài kulu Bɛ̀rɛ̀ Bɛ̀rɛ̀kpɛ, Arziki Nɔ̀ɔkpɛ Ká Nŋa yá hunanī koo wi. Nŋa yá nà gannā hàliita ka à baananī ka nam hunayoo tɛ À hàliitayo sɛ à bɔ̀nŋɔ̀. Nŋa yǎ nà bɔ̀nŋɔ̀dɔɔyo nna hàliita bèeri bèeriyo káayo ǹ gono ǹ kuna hàliita, ka siriyanī cirici wɔ̀ ká à gu À Kpèitɛ̀rɛ Jirima nna À Bayo ciba dam weenu nna hàndu nna ciini nna zaari kuna.

Nŋa nɔ̀ Warka À nà hewu baananī iri sɛ, hewu ká dě à si hunayo suu tɛ̀, Nŋa yǎ cìnjiyo zumani kìtɛ iri sɛ, nŋa À nà tèekuyo nna isāyo baananī iri sɛ, Nŋa yǎ bara ká À gu iri ŋmaaranī ko gu iri cɛrima sáa ká iri gono iri nyāyo gundeyo kuna ka sinna gaabi fɔ̀, Nŋa yǎ binɛɛ kpiri diranī iri gaayo lenŋiyo kuna zǎ iri hɛiyo hāri iri buyo.

Kpei Di Ká À bara Nɔrukpɛ, Hàlìitàkpɛ, Arziki Gòmìnìkpɛ nɔ̀ Irikpɛ Kpei Ká Ǎ Gɛiyo koo Beeriyo .

Irikpɛ Ká Ǎ Beeriyo cì :

﴿إِنَّ رَبَّكُمُ ٱللَّهُ ٱلَّذِي خَلَقَ ٱلسَّمَٰوَٰتِ وَٱلۡأَرۡضَ فِي سِتَّةِ أَيَّامٖ ثُمَّ ٱسۡتَوَىٰ عَلَى ٱلۡعَرۡشِۖ يُغۡشِي ٱلَّيۡلَ ٱلنَّهَارَ يَطۡلُبُهُۥ حَثِيثٗا وَٱلشَّمۡسَ وَٱلۡقَمَرَ وَٱلنُّجُومَ مُسَخَّرَٰتِۭ بِأَمۡرِهِۦٓۗ أَلَا لَهُ ٱلۡخَلۡقُ وَٱلۡأَمۡرُۗ تَبَارَكَ ٱللَّهُ رَبُّ ٱلۡعَٰلَمِينَ54﴾

«Cimi, noo Nɔrukpɛ nɔ̀ Irikpɛ Ká À nà bɔ̀nŋɔ̀dɔɔyo nna gannā hàliita jìbìrì idu bìnnī ka dù ka Tɛkɛ ka Beeri Gado Bèeri (Al'Archi) ga, Nŋa yǎ ciini nna zaari daabu nna cɛ̀rɛ ǹ dù koo cɛ̀rɛ cèeji kariga karigayo bɔ̀nŋɔ̀, nŋa À nà weenu nna hàndu nna hàndòoriyayo hàliita ka nam ň bàanīyo koo gonoyo À fòoro bɔ̀nŋɔ̀. Nŋa À Fɔlɔnku ŋmɛnɛ nɔ̀ hàliitayo nna fòoroyo kulu, Nŋa nɔ̀ Kpei Ká À ŋmɛnɛ àlheeri mutu koo bayo , Nŋa nɔ̀ hàliita kulu Nɔrukpɛ 54» [Al-A'araaf : 54] .

Irikpɛ yǎ bara hài kulu ká à gono gonoyo kuna Nɔrukpɛ nna ǹ Hàlìitàkpɛ zǎ hài ká irǐ hɔnnɛ nna hài ká iri suu hɔnnɛ, À bàasi hài kulu bara hàliita nɔ̀ À hàliitayo kuna, nŋa À Fɔlɔnku yǎ hìmāayo ǹ mà bɔ̀ɔta ŋmaa À sɛ, ka suu bɔ̀ɔta ŋmaa bɔrɔ̀ fɔ ŋmāanī sɛ koo margu nna Àla . Wece si À Sɛ À Mɛ̀iyo kuna dě binɛ À hàliitayo kuna dě binɛ À bɛ̀rɛ bɛ̀rɛyo kuna dě binɛ bɔ̀ɔta ŋmaayo À Sɛ kuna .

Dě mɛɛkakaw kuna iri ba dàm ká irikpɛ ŋmaanìyo fɔyo gono nna Irikpɛ Ká À Jirimaa Bayo koo Kùbeyo dà gonoyo dom ba sarā nɔ̀; domi à suu tɛ̀ irikpɛ hinka mó gonoyo ŋmɛnɛ àlǎmari bɛrɛ bɛrɛ wakati gure fɔ kuna, Irikpɛ Ká Ǎ Beeriyo c̀ :

﴿لَوۡ كَانَ فِيهِمَآ ءَالِهَةٌ إِلَّا ٱللَّهُ لَفَسَدَتَا...﴾

﴾Dě irikpɛ fɔyo dom gono bɔ̀nŋɔ̀dɔ nna ganna kuna Irikpɛ Kpei Bèeri bàasì dà ǹ dom ba sarā nɔ̀ (1)....﴿¹ [Al-Anbiyá'i : 22] .

Nɔrukpɛ Hàlìitàkpɛ ŋmɛnɛ Zěm Zěmyo :

Nɔrukpɛ Di Ká Ǎ Gɛiyo gonna Māa Hɛ̀nnɔ Káayo ǹ suu tɛ̀ kabuyo, nŋa À gonna Zěmyo tùutuuma Bèerìntɛyo Jìrìmàntɛyo Káayo ǹ gu À Tɔyo ka Kùbe ciba. À Kpèitɛ̀rɛ Māayo di kuna nɔ̀ : "Al-Khaaliq" (Hàlìitàpkɛ) nna "Allaahu" (Irikpɛ) ká hài ká ň nufi nna àla nɔ̀ : Warka bìnɛ̀yoo bāa Àla ko gu À jirimanī ko gu À bayani ko hamburu Àla ko gu À kàmuna ká À Fɔlɔnku yǎ hìmāayo nna nna ǹ mà bɔ̀ɔta mŋaa À sɛ́, À sinna wece. Māayo di kuna nɔ̀ "Al-Hayyu" (Warka Ǎ Hunayo), nna "Al-Kayyuumu" (Warka Ǎ Kɛiyo nna À Bɔ̀ŋɔ̄ɔ ko gu À hàliitayo kɛ̀yyani) nna "Ar-Rahiim" (Warka À Sisibii fisɔuyo nna àlsilàama hɛ̀nnɔyo), nna "Ar-Razzaaq" (Warka Ǎ hàliitayo nɔ hài ká ň huna nnā), nna "Al-Kariimu"(Àlheiri nna Jirima nna Gòminī tùutuumakpɛ) , Irikpɛ Ká Ǎ Beeriyo cì àl-Kùrani Jìrìmàntɛ kuna :

﴿ٱللَّهُ لَآ إِلَٰهَ إِلَّا هُوَ ٱلۡحَيُّ ٱلۡقَيُّومُۚ لَا تَأۡخُذُهُۥ سِنَةٞ وَلَا نَوۡمٞۚ لَّهُۥ مَا فِي ٱلسَّمَٰوَٰتِ وَمَا فِي ٱلۡأَرۡضِۗ مَن ذَا ٱلَّذِي يَشۡفَعُ عِندَهُۥٓ إِلَّا بِإِذۡنِهِۦۚ يَعۡلَمُ مَا بَيۡنَ أَيۡدِيهِمۡ وَمَا خَلۡفَهُمۡۖ وَلَا يُحِيطُونَ بِشَيۡءٖ مِّنۡ عِلۡمِهِۦٓ إِلَّا بِمَا شَآءَۚ وَسِعَ كُرۡسِيُّهُ ٱلسَّمَٰوَٰتِ وَٱلۡأَرۡضَۖ وَلَا يَـُٔودُهُۥ حِفۡظُهُمَاۚ وَهُوَ ٱلۡعَلِيُّ ٱلۡعَظِيمُ255﴾

Irikpɛ nɔ̀ Kpei Ká irikpɛ fɔ si ká à hìma ǹ mà bɔɔta fàassede Nŋa, Kpei Ká Ǎ hunayoo Ká Ǎ kɛ̄iyo nna À Bɔŋɔɔ koo hàliita kulu kɛ̄iyanīyo , dùsum su gu À zà bère jìbìrì, À mŋɛnɛ nɔ̀ hài Ká à gono bɔ̀nŋɔ dɔyo kuna nna hài ká à gono gannā kuna, mɛi yá ba hini ka à hànsinɛ fàaba ka À dɔ dě à nà ci nna À tùtuyo ! À gu À hàliitayo ŋmɛnɛ hài káayo ǹ tɛ̀ ka bisa bei nna ǹ ŋmɛnɛ hài káayo ň kà tɛ̀yo , ǹ dù ka na bara ká ň hàifɔ bei À hài kulu ká Ǎ bei kuna fàase hài ká À bāa (ǹ mà bei) , À Tìtà ba ka hɛ̄i ka bisa bɔnŋɔ dɔɔyo nna gannā, (nna à ya nɔ̀) ǹ cɛrimayo suu timyo ka binɛ ka suu gaabuyo À Sɛ , Nŋa nɔ̀ Kpei Ká Ǎ Beeriyo Ká

Ǎ Bayo ka Bara Jirima Bèerikpɛ. 255 [Suratu Al-Bakara : 255] .

Nŋa Irikpɛ Kpei Bèeri cí :

﴿قُلۡ هُوَ ٱللَّهُ أَحَدٌ١ ٱللَّهُ ٱلصَّمَدُ ٢ لَمۡ يَلِدۡ وَلَمۡ يُولَدۡ ٣ وَلَمۡ يَكُن لَّهُۥ كُفُوًا أَحَدُۢ4﴾

﴾Cì : Irikpɛ Di Nŋa nɔ̀ Irikpɛ Ká À bara nɔ̀ À Bɔ́nŋɔ̄fɔ 1

Irikpɛ Ká hàliita kuluu nufi nna à bùkaata biyayo cèejiyo 2

À na hɛi, ǹ binɛ ná À hɛi 3

hàifɔ binɛ na bara À cinɛ 4 ﴿ [Al-Ikhlaasu : 1-4].

Irikpɛ Di Ká À Sɛ nɔ̀ ň bɔ̀ɔta ŋmaa gu À Bɔŋɔɔ zěmyo nɔ̀ nna zěmyo káayo ň tɔyo koo kùbeyo

À ŋmɛnɛ zěmyo di kuna nɔ̀ : Nŋa nɔ̀ Kpei Ká ň bāa koo beerani ko jirimani koo hamburu ko kàmuna koo tamtɛrɛ ŋmaa À Sɛ nna cimi, À bàasi hài kulu bara hàliitàntɛ nɔ̀, ká ǹ tɛ̀kɛ gbei tɛyo, fòoròntɛ, lìizàayàntɛ.

À zěmyo di kuna nɔ̀ ká Nŋa nɔ̀ Warka Ǎ Hunayo koo Kɛiyo nna À Bɔ̀ŋɔ̄ɔ koo Hàliita kulu kɛiyanī , dě ya hùndèkònī kulu ká à gono gonoyo kuna Irikpɛ yá nà à hunanī ka kana àla zǎ zam ka gono kuna, nŋa Nŋa yǎ kùlaayo nna àla nna à gonoyo nna à hunayo hàyà nna hàika ǎ tɔ àla kulu. Ká à bara ya ni, Irikpɛɛ Dii hunayo nɔ́ ya ka su ba bu, nŋa à suu tɛ̀ À 'n beeni, Ǎ kɛiyo nna À Bɔŋɔɔ nɔ̀ ka bara hàliitayo kulu Kɛ̀iyànìkpɛ nŋa À suu jìbìrì, dùsum mosom su gu À zà bèr jìbìrì .

À zěmyo di kuna nɔ̀ ká Nŋa nɔ̀ Bèikpɛ Ká hàifɔ suu tukuyo À Sɛ ganna kuna bère sama kuna .

À zěmyo di kuna nɔ̀ ká Nŋa nɔ̀ Mãakpɛ Dìyàkpɛ Ká Ǎ mãa hài kulu koo diya hàliita fɔ kulu, Ǎ bei wisi wisi ká ǎ tɛ kùsùmayo kuna nna hàika jɛ̀nnɛ̀yoo tukuyo , hàifɔ suu tukuyo À sɛ ganna kuna bère sama kuna.

À zěmyo di kuna nɔ̀ ká Nŋa nɔ̀ Warka Ǎ hini , Ká hàifɔ su gu À mɔnŋɔyani , hàifɔ binɛ suu hàika À bāa yèeti , Ǎ tɛ hàika Ǎ bāa nɔ̀ koo honŋu hàika Ǎ bāa, Nŋa yǎ jinànī koo zinkiranī, Nŋa yǎ gonna Lasabu Hɛ̀nnɔ Tɔntɛ Kubèntɛ.

À zěmyo di kuna nɔ̀ ká Nŋa nɔ̀ Hàlìitàkpɛ, hunàyo hàyà Nɔ̀ɔkpɛ, àlǎmariyo Bɛ̀rɛ̀ Bɛ̀rɛ̀kpɛ Ká À nà hàliita kulu hàliita ka à hài kulu siriyanī , hàliita kulu gono À yiiko nna À liizaaya cìre nɔ̀.

À zěmyo di kuna nɔ̀ ká Nŋa nɔ̀ Warka Ǎ tutu bɔrɔ̀ fɔ kulu ká à gono màsu nna sènnɛ kuna sɛ, koo binɛ bibikpɛ ká ǎ fàaba céeji kulu fàaba, koo binɛ sari kulu hiibanī , hàliita kulu bara ká dě à kam binɛ bibi fɔ kuna aw masu fɔ kuna À dɔ nɔ̀ ǎ zulu ka yēi tilasi bɔ̀nŋɔ̀ .

Bɔ̀ɔtayo suu tɛ̀ fàase Irikpɛ Ká Ǎ Beeriyo Sɛ, Nŋa nɔ̀ Kpei Ká Ǎ Tɔyo koo Kùbeyo, Ká À Fɔlɔnku yǎ hìmayo nna bɔ̀ɔtayo di nŋa hàifɔ ŋmáani suu hìmāayo nnā, ya nɔ̀ hài kulu ká ǹ bɔ̀ɔta ka À nàm bara hàika ň bɔ̀ɔta kɔɔnu bɔnŋɔ nɔ̀ nŋa à bara hartàntɛ nɔ̀ ká à gono buyo nna beeniyo mɛ .

Irikpɛ Ká Ǎ Gɛiyo nà iri gòmini lǎakaliyo ká ň dū koo hàifɔ bei À Kpèitɛ̀rɛ Bayo nna À Jirima senni kuna, nŋa À nà hàlìitàtɛ̀rɛ hɛ̀nnɔ fɔ dɛ̀ɛsɛ iri gaayo kuna, hàlìitàtɛ̀rɛ hɛ̀nnɔ fɔ ká ǎ bāa alheiri koo kàbiya cùuta, koo nàssu koo lǎakali karani dě à huro nna Irikpɛ hàliita kulu Nɔrukpɛ. hàlìitàtɛ̀rɛ dii cìba À Kpèitɛrɛ Tɔyo ka Kube ga nɔ̀, ka yēi koo cìba ká à suu tɛ̀ ǹ mà À zém nna hartayo, Gɛiyoo tabbatayo À Ga.

À suu hìmāayo nna làakàlìntɛ à 'n bɔ̀ɔta mŋaa faasé Warka Ǎ kùbeyo sɛ, tɔ̀ nŋa mɛtɛ nɔ̀ ǎ bɔ̀ɔta ŋmaa hàliita fɔ zaŋa à tàka kà ǎ hartayo aw ka hartayoo bìsayo àla !

À suu tɛ̀ warka sɛ ň tàmtɛ̀rɛ ŋmáa mà bara bɔ̀rɔ dě binɛ toolu dě binɛ túuri dě binɛ hundèkòni fɔ !

Irikpɛ gono À samayo bɔnŋɔ̀ nɔ̀ koo Beeriyo koo Tɛ̀kɛyo À Gado Bèeri (Al-Archi) bɔ̀nŋɔ̀, koo fefèiyo koo ŋmàanɛɛyo nna À hàliitayo. À Bɔ̀ŋɔ̄ Kùsǔm si À hàliitayo kuna, À hàliitayo bɔ̀ŋɔ̄ kùsǔm hàifɔ si À Bɔ̀ŋɔ̄ Kùsǔm kuna. À suu huro ka binɛ ka suu ci gá À hàliitayo hàifɔ kuna .

Irikpɛ Di, hàifɔ na bara À Tàka, Nŋa binɛ nɔ̀ Warka Ǎ mãa koo diyā, À sinna cinɛ, Nŋa yǎ wàdaatayo ka suu bá hàifɔ bùkaata À hàliitayo dɔ, À suu ŋmǎ, À suu jìbìri, Nŋa yǎ Bayo koo bara Jirima Bèerikpɛ ká À suu tɛ̀ Á 'n gonna wei dě binɛ kōo; ká à bara ya ni, Hàlìitàkpɛ gonna Zěm Zěmyo Beeri Jìrìmàntɛyo nɔ̀ ya , nŋa à suu tɛ̀ bùkaata dě binɛ hartayo mà bara À Zěmyo.

Irikpɛ Ká Ǎ Beeriyo cì :

﴿يَٰٓأَيُّهَا ٱلنَّاسُ ضُرِبَ مَثَلٞ فَٱسۡتَمِعُواْ لَهُۥٓۚ إِنَّ ٱلَّذِينَ تَدۡعُونَ مِن دُونِ ٱللَّهِ لَن يَخۡلُقُواْ ذُبَابٗا وَلَوِ ٱجۡتَمَعُواْ لَهُۥۖ وَإِن يَسۡلُبۡهُمُ ٱلذُّبَابُ شَيۡـٔٗا لَّا يَسۡتَنقِذُوهُ مِنۡهُۚ ضَعُفَ ٱلطَّالِبُ وَٱلۡمَطۡلُوبُ ٧٣ مَا قَدَرُواْ ٱللَّهَ حَقَّ قَدۡرِهِۦٓۚ إِنَّ ٱللَّهَ لَقَوِيٌّ عَزِيزٌ74﴾

«Noo boroo, ǹ nà sàsàwànì tɛ̀ noo sɛ, wà hanŋa feeri ka mãa àla : warkaayo sɛ noo bɔ̀ɔta ŋmáa ka Irikpɛ nàm di suu hini ka hamini hàliita bá ǹ nà cɛ̀rɛ kùmma à gànna, bá hamini dí nà hàifɔ kɔm ǹ ga ǹ suu hini ka ǹ bɔ̀ŋɔ̄ɔyo fàaba ka tà ǹ ga, zǎ tooluyo di nna hamini di kulu bara mɔ̀nŋɔ̀ntɛ̀yo nɔ̀ .

Ǹ ná Irikpɛ bayani ka À jirimanī À Bayo nna À Jirima zaka (ká à hìmayo nnā)(1), lalle Irikpɛ nɔ̀ Gàabìkònī Bɔ̀ɔyàkpɛ 74».² [Al-Hajj : 73-74] .

Ifɔ gànna nɔ̀ Hàlìitàkpɛ Bèeri Jìrìmàntɛ Di nà iri háliita ? Nŋa ifɔ Ǎ bāa nna iriyo ?

Aayala lǎakàlìntɛ ba tutu ká Irikpɛ nà hàliitayo wɔ̀ kulu hàliita nɔ̀ ká à nà bara guuri fɔ bɔnŋɔ̀ ? Aayala Irikpɛ À nà hàliitayo di hàliita nɔ̀ hɔ̀ɔrɛ bɔ̀nŋɔ , beesinka Nŋa yǎ Mutu ka bara Gòni ka bara Bèiyo kulu Tìkìkpɛ ?

Aayara lǎakàlìntɛ̀ hɛ̀nnɔ ba tutu ká Warka À nà iri hàliita ka nàm iri hàlita wɔ̀ yási mutu koo sawayo koo bòoriyo ka jàasa, nŋa À nà hàika à gono samayo nna ganna kuna baananī iri sɛ, à kuluyo wɔ̀ mà bara À nà iri hàliita nɔ̀ ká à na bara nna guuri fɔ dě binɛ à 'n bara À mà iri nàm ka ná hãyo káayo ǹ mutu ko gu iri kɔtɔyo tutu iri sɛ, zàŋa : Ifɔ gànna nɔ̀ iri gono nɛ̌ dɔ (Anduniya wɔ̀ kuna) ? Ifɔ yǎ gono buyo banna ? Ifɔ nɔ̀ ň guuri nna iri hàliitayo ?

Aayara lǎakali hɛ̀nnɔ ba tutu ká hanŋa cenìyo su ba gono tìkì dàarìikpɛ sɛ ihɛ̀nnɔ banayo mà gono ihɛ̀nnɔ tɛ̀ɛkpɛ sɛ ?

Irikpɛ Ká Ǎ Gɛiyo cì :

﴿أَفَحَسِبۡتُمۡ أَنَّمَا خَلَقۡنَٰكُمۡ عَبَثٗا وَأَنَّكُمۡ إِلَيۡنَا لَا تُرۡجَعُونَ115﴾

«Dě ya noo tàma ká Iri de nà noo hàliita hɔ̀ɔrɛ kɔ̀ɔnu bɔ̀nŋɔ nɔ̀, nna ká ǹ su ba noo yèeti kitɛ Iri dɔ (no buyo banna) 115 ?» [Al-Muuminuun : 115] .

Haika à bara deidei nɔ̀ ká Irikpɛ nà dìyàyo dɔ̀ntɔ kìtɛ domi iri 'n dùwa ka hàika gànna iri gono bei , nŋa À nà iri cìba yási ká iri ba À bɔ̀ɔta koo màanì nna Àla, nna hàika Ǎ bāa nna iriyo ! nna mɛtɛ yási iri ba tɛ ka duwa À yarda g, nŋa À nà iri beiyanī iri yēiyo dɔ buyo banna .

Nŋa Irikpɛ nà dìyàyo dɔ̀ntɔ kìtɛ ǹ mà iri beiyanī ká Irikpɛ Fɔlɔnku yáa hìmāayo ǹ bɔ̀ɔtayo À sɛ, iri 'n yēi ka bei mɛtɛ yási iri bó gu À bɔ̀ɔta, ǹ mà yēi ka iri beiyanī À fòoroyo nna À hònŋɛɛyo, kaa yēi ka iri beiyanī tàbiya hɛ̀nnɔyo káayo dě iri nà ǹ kɔtɔ iri hunayo ba bòori àlheiriyo nna àlbarkayo mà à faafu.

Irikpɛ binɛ nà dìyà tùutuuma dɔ̀ntɔ kìtɛ zàŋa : (Nuuh, Ibrahiim, Muusá nna ISSA) ka ǹ tɛ̀ɛmàko nna muujizayo káayo ň cìbayo ká cimi nɔ̀ ň tɛ nŋa lalle ǹ bara dɔ̀ntɔ̀ntɛyo nɔ̀ zǎ Irikpɛ Ká Ǎ Gɛiyo dɔ, nŋa ǹ kɔ̀kɔ̀rɔ̀ yǎ du ka bara Muhammadu (Irikpɛ mà à fɔ̌ ka à saabu ka à yeenanī).

Lalle dìyàyo di kulu nà iri nɔ làabaari làabaari nɔyo gɛiyàntɛ kulu tìkì ká hunayo wɔ̀ (anduniya kuna) bara zarabani nɔ̀, hunayo bɔ̀ŋɔ̄ bɔ̀ŋɔ̄ cɛ̀rɛ ba gono nɔ̀ buyo banna (laahara kuna).

Nna ká àljanna gono àlsìlaama hɛ̀nnɔyo sɛ nŋayo káayo ǹ nà Irikpɛ bɔ̀ɔta À Fɔlɔnku Ká wece si À Sɛ, ka cimi nɔ dìyàyo kulu sɛ, nna ká nìnɛ̀ gono ká Irikpɛ nà à sɔ̀ɔru gùtùruyo (ceferiyo) sɛ nŋayo káayo ǹ nà irikpɛ ŋmàanì fɔyo bɔ̀ɔta ka margu nna Irikpɛ aw binɛ ǹ ci ceferiyo Irikpɛ dìyàyo kuná àfɔ sɛ .

Irikpɛ Ká Ǎ Beeriyo c̀ :

﴿يَٰبَنِيٓ ءَادَمَ إِمَّا يَأۡتِيَنَّكُمۡ رُسُلٞ مِّنكُمۡ يَقُصُّونَ عَلَيۡكُمۡ ءَايَٰتِي فَمَنِ ٱتَّقَىٰ وَأَصۡلَحَ فَلَا خَوۡفٌ عَلَيۡهِمۡ وَلَا هُمۡ يَحۡزَنُونَ ٣٥ وَٱلَّذِينَ كَذَّبُواْ بِـَٔايَٰتِنَا وَٱسۡتَكۡبَرُواْ عَنۡهَآ أُوْلَٰٓئِكَ أَصۡحَٰبُ ٱلنَّارِۖ هُمۡ فِيهَا خَٰلِدُونَ36﴾

«Noo Aadama kōoyo dě dìyàyo kà noo sɛ zǎ noo kuna nna koo À ŋmɛnɛ Aayayo cou noo sɛ, saa di warka à hamburu (Irikpɛ) ka gbei bòriyanī hàifɔ hamburuyo su ba gono ǹ sɛ laahara ya nɔ̀ ǹ su ba binɛ̀ bibi tɛ (hàifɔ ká à bìsa bɔ̀nŋɔ̀) 35

Warkáayo nŋayo nà Iri aayayo kakāw ka jirimankɛi tɛ̀ nna ǹla coroo di nìnɛ̀ boroo nɔ̀ ya ǹ bó gɔ̀ngɔ̀rɔ̀yo à kuna 36» [Al-Aaraaf : 35-36] .

Irikpɛ Ká Ǎ Beeriyo cì :

﴿يَٰٓأَيُّهَا ٱلنَّاسُ ٱعۡبُدُواْ رَبَّكُمُ ٱلَّذِي خَلَقَكُمۡ وَٱلَّذِينَ مِن قَبۡلِكُمۡ لَعَلَّكُمۡ تَتَّقُونَ٢١ ٱلَّذِي جَعَلَ لَكُمُ ٱلۡأَرۡضَ فِرَٰشٗا وَٱلسَّمَآءَ بِنَآءٗ وَأَنزَلَ مِنَ ٱلسَّمَآءِ مَآءٗ فَأَخۡرَجَ بِهِۦ مِنَ ٱلثَّمَرَٰتِ رِزۡقٗا لَّكُمۡۖ فَلَا تَجۡعَلُواْ لِلَّهِ أَندَادٗا وَأَنتُمۡ تَعۡلَمُونَ ٢٢ وَإِن كُنتُمۡ فِي رَيۡبٖ مِّمَّا نَزَّلۡنَا عَلَىٰ عَبۡدِنَا فَأۡتُواْ بِسُورَةٖ مِّن مِّثۡلِهِۦ وَٱدۡعُواْ شُهَدَآءَكُم مِّن دُونِ ٱللَّهِ إِن كُنتُمۡ صَٰدِقِينَ ٢٣ فَإِن لَّمۡ تَفۡعَلُواْ وَلَن تَفۡعَلُواْ فَٱتَّقُواْ ٱلنَّارَ ٱلَّتِي وَقُودُهَا ٱلنَّاسُ وَٱلۡحِجَارَةُۖ أُعِدَّتۡ لِلۡكَٰفِرِينَ ٢٤ وَبَشِّرِ ٱلَّذِينَ ءَامَنُواْ وَعَمِلُواْ ٱلصَّٰلِحَٰتِ أَنَّ لَهُمۡ جَنَّٰتٖ تَجۡرِي مِن تَحۡتِهَا ٱلۡأَنۡهَٰرُۖ كُلَّمَا رُزِقُواْ مِنۡهَا مِن ثَمَرَةٖ رِّزۡقٗا قَالُواْ هَٰذَا ٱلَّذِي رُزِقۡنَا مِن قَبۡلُۖ وَأُتُواْ بِهِۦ مُتَشَٰبِهٗاۖ وَلَهُمۡ فِيهَآ أَزۡوَٰجٞ مُّطَهَّرَةٞۖ وَهُمۡ فِيهَا خَٰلِدُونَ25﴾

«Noo boroo wà bɔ̀ɔta ŋmáa noo Nɔrukpɛ sɛ Kpei Ká À nà noo hàliita nna warkaayo ǹ jina ka kà noo sɛ , domi wà tɔ Irikpɛ hàmbùre gá 21

Kpei Ká À nà gannā ci dàariji noo sɛ ka sama ci à sɛ làasì ka à ciniyo kùbeyoo jaasayo, nŋa À nà cinji zumanī zǎ bɔ̀nŋɔ̀ dɔ ka tuuri hinzeyo kàa nna cinji hari di domi ǹ mà bara hunayo hàya noo sɛ , à sɛɛ gànna wà suu wece tɛ Irikpɛ sɛ ka du koo bei (ká À bara À Fɔlɔnku nɔ̀) 22

Dě noo gono sika kuna nna hàika Iri zumanī Iri tǎm (Muhammadu) sɛ nɔ̀, tɔ̀ wà kana suura gùre fɔ zaŋa à tàka, saadi wà noo séeda kàakpɛɛyo cɛ kitɛ Irikpɛ bàasì, dě noo bara cìmìtèeriyo .

Dě noo nà tɛ ya , noo binɛ mosom su ba hini ka tɛ ya nɔ̀ , À sɛ gànna wà hamburu nìnɛ̀ ká à kubaniyo hàyà nɔ̀ boroo nna tonniyo, ǹ dù ka à sɔ̀ɔru cefriyo sɛ nɔ̀ 24

N mà warkáayo coroo nà cimi nɔ ka gbei hɛ̀nnɔyo tɛ nɔ làabaari kàanɔ ká àljannayo káayo isayoo zùru ǹ cìreyo gono ǹ sɛ (laahara). (Ǹ kuna) ba sāafɔ ǹ nà ǹ nɔ ǹ ŋmɛnɛ tǔuri hinzeyo kuna àfɔ se ǹ mà cì : warka ǹ dom jina ka iri nɔ nɔ̀ ya, ǹ dù ka kàna ǹ sɛ àla nɔ̀ nŋa ǎ hìmāayo nna sìntè ŋmɛnɛ di. Àljanayo di kuna ǹ gonna wèi gɛ̀iyaǹtɛyo , ǹ mà yēi koo gɔ̀ngɔ̀rɔ̀yo koo gonoyo ǹ kuna .

[Al-Baqarah : 21-25] .

Ifɔ gànna nɔ̀ dìyàyo hɛi ba ka bara ŋmàanì ŋmàanì ?

Cimi nɔ̀ ká Irikpɛ nà À dìyàyo dɔ̀ntɔ zàmāayo ga, zàmāa (àl-ummah) fɔ si fàase à bara ká Irikpɛ nà dìyà samma ǹ ga, domi à mà ǹ cɛ ka kpee nnā bɔ̀ɔta ŋmáayo ǹ Nɔrukpɛ sɛ ga, ka À Fòoroyo nna À Honŋɛɛyo tɔyanī ǹ ga, nŋa ǹ kulu ŋmɛnɛ cɛyo di guuri bara nɔ̀ : tàmtɛ̀rɛ̄ ŋmǎayo Irikpɛ Yiiko Kulu nna Jirima Bèerikpɛ Fɔlɔnku Sɛ. Baa saafɔ binɛ zamāa bá ifɔ di sinti koo fòoroyo ǹ mà Irikpɛ ci À fɔ ká ǹ dìyà kà nnā ǹ sɛ nàm aw koo gu à mɛɛranī, se Irikpɛ mà dìyà fɔ ŋmàanī sàmma ka à tɛ̀kɛ à mà ǹ dìrau hìnsa ka boroo yēeti hàliitàtɛ̀rɛ dèidèintɛ bɔnŋɔ nna Irikpɛ ciyo Àfɔ nna À ganayo,

Hali Irikpɛ nà dìyàyo di bɔnŋɔ̀ wi nna Andébi Muhammadu (Irikpɛ mà à fɔ̌ ka à saabu ka à yeenanī), nŋa ká à kà nna àdiini kùbèntɛ nna Chariya gɔ̀ngɔ̀rɔ̀ntɛ ká à bɔrɔ̀ kulu marguyo hali cìyámā kɛiyo hɛnɛ, sàriya di ká à nà sàriya káayo ǹ jina kulu kubanī ká ǹ tuusu, nŋa Iri Nɔrukpɛ Jirima Bèerikpɛ Ká Ǎ Beeriyo dù ka cīnnì ka gono nna gɔ̀ngɔ̀rɔ̀yo hali ciyáma kɛiyo hɛnɛ jìsi ka à tabbatanī àdiini wɔ̀ sɛ.

Bɔ̀rɔ̀ fɔ suu bara ciminɔ̀ɔkpɛ faasede à nà cimi nɔ dìyàyo di kulu sɛ̀.

Irikpɛ yǎ nà dìyàyo di kulu samma , ka À hàliitayo kulu fòoro nna ǹ ganayo, warka à ci ceferi ǹ kuna àfɔ̀ ŋmɛnɛ dìyàtɛrɛ sɛ, à ci ceferi ǹ kulu sɛ nɔ̀ ya. À gànna tàali fɔ sí ká à bayo bìsa bɔ̀rɔ mà Irikpɛ dìyàtɛ̀rɛ yèeti ka honŋu à ganayo, dě ya Al-Janna huroyo mà dù ka tɛ̄ se nna cimi nɔyo dìyàyo di kulu sɛ̀.

Ká à ci ya ni, hàika à bara tilasì bɔ̀rɔ̀ fɔ kulu ga záamani wɔ̀ kuna nɔ̀ à 'n cimi nɔ Irikpɛ Sɛ nna Irikpɛ dìyàyo kulu sɛ, ka cimi nɔ hanu kɔ̀kɔ̀rɔ̀ sɛ, zàŋa ya binɛ suu tɛ̀ faase à 'n cimi nɔ dìyàyo dí kɔ̀kɔ̀rɔ̀ nna ǹ mɛ̀ɛwì Muhammadu (Irikpɛ mà à fɔ̌ ka à saabu ka à yéennī) sɛ ka à gana, dìyà ká Irikpɛ nà à tɛ̀ɛmako nna munjiza gɔ̀ngɔ̀rɔ̀ntɛ ká nŋa nɔ̀ àl-kùrani jìrìmàntɛ ká Irikpɛ nà à cɛrmayo ŋmɛnɛ àlkawali zàa hali À 'n ganna nna hàika à gono à bɔ̀nŋɔ tubi ŋmǎa (ciyámā kɛiyo hɛnɛ) .

Irikpɛ cì àl-kùrani jìrìmàntɛ kuna ká warka à honŋu cimi nɔyo dìyà bá ifɔ di sɛ À Kpèitɛrɛ dìyàyo kuna à kpɛ di bara ceferi Irikpɛ sɛ nɔ̀ ya ka yēi ka bara À ŋmɛnɛ dìyàtɛ̀rɛ kàkàwkpɛ , Irikpɛ Ká Ǎ Beeriyo cì :

﴿إِنَّ ٱلَّذِينَ يَكۡفُرُونَ بِٱللَّهِ وَرُسُلِهِۦ وَيُرِيدُونَ أَن يُفَرِّقُواْ بَيۡنَ ٱللَّهِ وَرُسُلِهِۦ وَيَقُولُونَ نُؤۡمِنُ بِبَعۡضٖ وَنَكۡفُرُ بِبَعۡضٖ وَيُرِيدُونَ أَن يَتَّخِذُواْ بَيۡنَ ذَٰلِكَ سَبِيلًا ١٥٠ أُوْلَٰٓئِكَ هُمُ ٱلۡكَٰفِرُونَ حَقّٗاۚ وَأَعۡتَدۡنَا لِلۡكَٰفِرِينَ عَذَابٗا مُّهِينٗا151﴾

«Warkáayo ǹ gu Irikpɛ nna Adìyàyo guturu koo bāa ǹ mà fefei dàm Irikpɛ nna À dìyàyo binni koo cì irii cimi nɔ dìyàyo di kuna àfɔyo sɛ kó gu ǹ kuna àfɔyo guturansi nŋa ň bāa ǹ mà hìnì fɔ ŋmàanì zà (ceferìtɛ̀rɛ nna ciminɔyo binni koo tàmaayo ká nŋa di yá ba ǹ yeenanī) 150 .

Còroo di cèferi bɔ̀ŋɔ̄ bɔ̀ŋɔ̄ɔyo nɔ̀ ya, Iri binɛ nà àzaaba wàlànkànsìntɛ sɔ̀ɔru ceferiyo sɛ 151 » [Annisaai : 150-151] .

À gànna nɔ̀ iriyo àlssìlaamayo irǐ cimi nɔ Irikpɛ sɛ nna hanu kɔ̀kɔ̀rɔ̀ sɛ - zàŋa ká Irikpɛ fòoro - nŋa irǐ cimi nɔ dìyàyo kulu sɛ nna Tilayo kulu káayo ǹ jina (ka zummu kìtɛ zâ Irikpɛ dɔ), Irikpɛ Ká Ǎ Beeriyo cì:

﴿ءَامَنَ ٱلرَّسُولُ بِمَآ أُنزِلَ إِلَيۡهِ مِن رَّبِّهِۦ وَٱلۡمُؤۡمِنُونَۚ كُلٌّ ءَامَنَ بِٱللَّهِ وَمَلَٰٓئِكَتِهِۦ وَكُتُبِهِۦ وَرُسُلِهِۦ لَا نُفَرِّقُ بَيۡنَ أَحَدٖ مِّن رُّسُلِهِۦۚ وَقَالُواْ سَمِعۡنَا وَأَطَعۡنَاۖ غُفۡرَانَكَ رَبَّنَا وَإِلَيۡكَ ٱلۡمَصِيرُ285﴾

«Irikpɛ Dìyà (Muhammadu ,Irikpɛ ŋmɛnɛ Fɔ̌yo nna À Saabuyo nna À Yeenanīyo mà tɔ à ga) nà cimi nɔ hàika ǹ zumani à sɛ zǎ Irikpɛ dɔ, nna àlsìlaama hɛ̀nnɔyo bɔŋɔɔyo, ǹ kuna bá mɛi nà cimi nɔ Irikpɛ sɛ nna À Màlàaikayo sɛ nna À Tilayo sɛ nna À Dìyàyo sɛ. Iri suu fèfèi dàm (ǹ kuna) àfɔ nna à hànsinɛ dìyàyo binni, nŋa ǹ cì : iri mãa ka gana . N mà iri kɔɔsu, iri Nɔrukpɛ, N dɔ nɔ yēiyo dɔ gono 285» [Al-Bakarah : 285] .

Ifɔ ň cɛ àl-kùranī jìrìmàntɛ ?

Àl-kùranī jìrìmàntɛ nɔ̀ Irikpɛ Ká Ǎ Beeiyo ŋmɛnɛ Mɛɛcìnɛ̀ nna À dìyàtɛ̀rɛ ká À nà à zumanī dìyàyo kɔ̀kɔ̀rɔ̀ Muhammadu sɛ, nŋa yǎ binɛ bara mùnjizayo kuna warka à bayoo bìsayo ká ǎ cibayo Andébi Muhammadu (Irikpɛ mà à fɔ̌ ka à saabu ka à yeenanī) ŋmɛnɛ àndèbitɛrɛ cimi ga, kpɛ̌nɛ Àl-kùranī jìrìmàntɛ di yǎ bara cimi à hukumusiyo kuna koo bara cimi à làabàariyo kuna,

Nŋa Irikpɛ nà saara ŋmaarɛ tàngàri cìfɔyo ga ká cèeji ǹ mà kàna bá àl-kùranī di ŋmɛnɛ suura fɔ tìkì tàkā , nŋa ǹ mɔ̀nŋɔ̀ zàŋa ya tɛyo ; hàika ǎ cì bayo gànna nna kà hàika à gono à kunaa hài kulu ká ǎ làtìyo nna bɔ̀rɔ anduniya nna laahara hunayo senni kuna marguyo, nŋa à kuna àlǎmari cimi ŋmɛnɛyo káayo ǹ làtìyo nna cimi nɔyo káayo cimi nɔyo ǹ sɛ bara tilasì kulu yēi ka gono,

Zàŋa ká à kuna fòoroyo gono nna honŋɛɛyo káayo à bara tilasì bɔ̀rɔ mó dìra ǹ bɔ̀nŋɔ nŋa nna à Nɔrukpɛ bìnni senni kuna, dě binɛ̀ nŋa nna à bɔ̀ŋɔ̄ bìnni senni kuna, dě bìnɛ nŋa nna hàliita cìnniyo bìnni senni kuna, à kuluyo wɔ̀ dù ka gono à kuna nɔ̀ nna mɔɔ yási ciricī ká à bara cìnɛ̀ ŋmáaniyo nna cìnɛ̀ kpàarɛ̄ tɛyo dɔ kàmmɛ ŋmɛnɛ .

Nŋa à yēi koo dàliili tùutuuma marguyo zǎ lǎakali hɛ̀nnɔ ŋmɛnɛyo nna àlǎmari cimi ŋmɛnɛ káayo ǹ bara beiyo dɔ kàmmɛ ŋmɛnɛyo káayo ň cìbayo ká tila wɔ̀ suu tɛ̀ à 'n bara bɔ̀rɔ ŋmɛnɛ tɛyo kuna, àmma à de bara nɔ̀ bòroo Nɔrukpɛ Ká Ǎ Gɛiyo Kó Beeriyo Mɛɛcìnɛ̀ .

Ifɔ nɔ̀ Àlsìlàamàtɛ̀rɛ ?

Àlsìlàamàtɛ̀rɛ nɔ̀ bɔ̀ŋɔ̄ cɛɛnanīyo nna bɔ̀ŋɔ̄ baananīyo kulu Irikpɛ Ká Ǎ Beeriyo sɛ À ciyo À Fɔ bɔnŋɔ , nna bɔ̀ŋɔ̄ kùsǔm nɔyo À sɛ À gànayo bɔ̀nŋɔ̀, nna gbei tɛyo nna À sariya yardayo nna tayo bɔ̀nŋɔ̀, nna hài kulu ká ň bɔ̀ɔta Irikpɛ bàasi gutuluyo .

Irikpɛ binɛ nà Dìyàyo dɔ̀ntɔ nna dìyàtɛ̀rɛ gùre fɔ ká nŋa nɔ̀ : cɛyo koo kpee nnā Irikpɛ bɔ̀ɔtayo ga À fɔlɔnku Ká À sinna wece, nna hài kulu ká ň bɔ̀ɔta Irikpɛ báasi gutulùyo .

Àlsìlàamàtɛ̀rɛ binɛ bara andebiyo kulu ŋmɛnɛ àdiini nɔ̀, ǹ kulu ŋmɛnɛ cɛyo bara nɔ̀ àfɔ nŋa ǹ ŋmɛnɛ sàriayo dù ka bara ŋmàanī ŋmàanī. Hɔ̃ɔ̃yo binɛ ká kuna iri gono, Àlsìlaamayo fɔlɔnku yǎ àdiini deidei ŋmɛnɛ ká andebiyo kulu kà nnā kɔtɔyo, nŋa Àlsìlàamàtɛ̀rɛ ŋmɛnɛ dìyàtɛ̀rɛ yǎ bara cimi zaamani wɔ̀ kuna, nŋa nŋa yǎ bara dìyàtɛ̀rɛ mɛ̀ɛwì ká á gono bòroo sɛ zǎ Irikpɛ dɔ .

Ká à bara ya ni , Kpei Ká À nà Ibraahiima nna Muusa nna Iisa (fɔ̌yo hɛ̀nnɔ mà tɔ ǹ ga) dɔ̀ntɔ , Kpei Di yáa nà Dìyàyo mɛ̀ɛwì Muhammadu bɔ̀ŋɔ̄ dɔ̀ntɔ kìtɛ (Irikpɛ mà à fɔ̌ ka á saabuu ka à yeenanī) , nŋa lalle Àlsìlàamàtɛ̀rɛ ŋmɛnɛ sàriya dù ka kà nɔ̀

koo bara sàriyo káayo ǹ jina à sɛ tùusùkpɛ .

Cimi, àdiiniyo kulu káayo bòroo bɔ̀ɔta ŋmǎ nnā hɔ̃ɔyo wɔ̀ kuna - Àlsìlàamàtɛ̀rɛ báasi - àdiiniyo nɔ̀ káayo ǹ bara bòroo tɛyo , dě binɛ ǹ dom bara Irikpɛ ŋmɛnɛyo nŋa bòroo nà kàmmɛ̀ damu ǹ kuna ka hɔ̀ɔrɛ̀ nnā, nŋa ǹ bɛ̀rɛ ka ci hàifɔ ká à margu ka bìrìji nna fǎji nna gbei kɔ̀ɔnu kɔ̀ɔnuyo káayo ň tɛ̀kɛ tɛ̀kɛyo cɛ̀rɛ ga nna jenni jenniyo nna bòroo ŋmɛnɛ koookariyo .

Àlsìlaamayo ŋmɛnɛ àdiini cɛ̀rɛ yàa bara àdiini fɔlɔnku ká ǎ gɛiyo ka suu bɛ̀rɛ, zàŋa ká ǹ ŋmɛnɛ bɔ̀ɔta ŋmáayo gbeiyo káayo ǹ gu Irikpɛ bɔ̀ɔta nnā bara nɔ̀ àfɔ, ǹ kuluyo yǎ binɛ jingari gu (5) jingari , ko gu ǹ nɔ̀ruyo ŋmɛnɛ zàkāa kǎ , koo mɛɛhaw hàndu haw. N mà yēi ka nùura yèeti ǹ Tila nyá ká nŋa nɔ̀ àl-kùranī jìrìmàntɛ ga (ǹ bà diya ká) à bara nɔ̀ àfɔ kpaarayo kulu kuna . Irikpɛ Ká Ǎ Beeriyo ci :

﴿...ٱلۡيَوۡمَ أَكۡمَلۡتُ لَكُمۡ دِينَكُمۡ وَأَتۡمَمۡتُ عَلَيۡكُمۡ نِعۡمَتِي وَرَضِيتُ لَكُمُ ٱلۡإِسۡلَٰمَ دِينٗاۚ فَمَنِ ٱضۡطُرَّ فِي مَخۡمَصَةٍ غَيۡرَ مُتَجَانِفٖ لِّإِثۡمٖ فَإِنَّ ٱللَّهَ غَفُورٞ رَّحِيمٞ﴾

«Hɔ̃ɔ hanu wɔ̀ nɔ̀ À nà noo ŋmɛnɛ àdiini kubanī noo sɛ, ka À ŋmɛnɛ alheiri funtanī noo sɛ, ka yarda nna Àlsìlàamàtɛ̀rɛ mà bara noo sɛ àdiini, noo kuna warka hɛ̀ɛrɛ mayo sáabu nà à tɔyanī mɛ̀ɛmùnà bùko ŋmǎayo ga tilasì bɔ̀nŋɔ à dù ka na bara ǎ bāa tàali gbei tɛyo zàŋa ya tɛyo kuna , à sinna tàali (à mà à ŋmǎ) , domi Irikpɛ bara tàali Kɔ̀ɔsùkpɛ nɔ̀ Sisibi Màakpɛ.» [Al-Maaida : 3].

Nŋa Irikpɛ Ká Ǎ Beeriyo cí àl-kùranī kuna kpɛ̌nɛ :

﴿قُلۡ ءَامَنَّا بِٱللَّهِ وَمَآ أُنزِلَ عَلَيۡنَا وَمَآ أُنزِلَ عَلَىٰٓ إِبۡرَٰهِيمَ وَإِسۡمَٰعِيلَ وَإِسۡحَٰقَ وَيَعۡقُوبَ وَٱلۡأَسۡبَاطِ وَمَآ أُوتِيَ مُوسَىٰ وَعِيسَىٰ وَٱلنَّبِيُّونَ مِن رَّبِّهِمۡ لَا نُفَرِّقُ بَيۡنَ أَحَدٖ مِّنۡهُمۡ وَنَحۡنُ لَهُۥ مُسۡلِمُونَ ٨٤ وَمَن يَبۡتَغِ غَيۡرَ ٱلۡإِسۡلَٰمِ دِينٗا فَلَن يُقۡبَلَ مِنۡهُ وَهُوَ فِي ٱلۡأٓخِرَةِ مِنَ ٱلۡخَٰسِرِينَ85﴾

«Cì : iri nà cimi nɔ Irikpɛ sɛ nna hàika ǹ zumani (àl-kùranī) kìtɛ iri sɛ nna hàika ka ǹ zùmani Ibraahima sɛ nna Ismaaiilu nna Ishàaka nna Yaakuuba Yaakuuba kōoyo nna hàika (tila) ká ǹ kàna Muusa nna Iisa nna Andebi cìnniyo sɛ zǎ ǹ Nɔrukpɛ dɔ. Iri suu fèfèi dam ǹ kuna àfɔ nna à hànsìnɛ̀ bìnni, iri de gu iri bɔ̀ŋɔ̄ɔyo nɔyo koo gu iri bɔ̀ŋɔ̄ɔyo baananīyo Irikpɛ sɛ nɔ̀ 84

Warka binɛ à gu Irikpɛ ganā nna àdiini fɔ ká à nà bara Àlsìlàamàtɛ̀rɛ, ǹ suu tà à sɛ , Hanu Kɔ̀kɔ̀rɔ̀ kuna binɛ à bó gono gbei kɔ̀ɔnukpɛɛyo kuna nɔ̀ 85» . [Aali-Imraan : 84-85] .

Dě ya Àlsìlàamàtɛ̀rɛ ŋmɛnɛ àdiini bara hìnì sìrìyàntɛ ká ǎ hunayo kulu marguyo, koo sawayo nna hàlìitàtɛ̀rɛ sìntè nna lǎakali hɛ̀nnɔ, nŋa bìnɛ̀ dèidèintɛ àlàafìàntɛyo gu à tàyo, Hàlìitàkpɛ Bèeri Jirima Bèerikpɛ yǎ nà à ci sariya À hàliitayo sɛ, nŋa à bara nɔ̀ àlheiri nna bɔnkaani bòroo sɛ Anduniya nna Laahara kuna ŋmɛnɛ àdiini , à suu dimi fɔ fisau ka dimi fɔ nàm, bère gaa kuuru kàma fɔ ka gaa kuuru kàmà fɔ nàm, à kuna bòroo bara nɔ̀ àfɔ koo sawayo nna cɛ̀rɛ. Àlsìlàamàtɛ̀rɛ di kuna bɔ̀rɔ̀ fɔ suu fisauyo koo bìsayo à hànsìnɛ̀ fàase nna à gbei hɛ̀nnɔ zakā.

Irikpɛ Ká À Beeriyo cì :

﴿مَنۡ عَمِلَ صَٰلِحٗا مِّن ذَكَرٍ أَوۡ أُنثَىٰ وَهُوَ مُؤۡمِنٞ فَلَنُحۡيِيَنَّهُۥ حَيَوٰةٗ طَيِّبَةٗۖ وَلَنَجۡزِيَنَّهُمۡ أَجۡرَهُم بِأَحۡسَنِ مَا كَانُواْ يَعۡمَلُونَ97﴾

«Warka à nà gbei hɛ̀nnɔ fɔ tɛ, hàrùbɔ̀rɔ̀ dě binɛ wèibɔ̀rɔ̀, ka dù ká bara cìmìnɔ̀ɔri, Iri ba à hunanī hunaniyo hɛ̀nnɔ, ka yēi ka ǹ nɔ ǹ gbeiyo ŋmɛnɛ bànā à 'n bòori ka bisa hàika ǹ dom gono koo tɛ (Anduniya kuna) 97» [An-Nahali : 97].

Àlsìlàamàtɛ̀rɛ bara bɔnkaani hini nɔ̀

Àlsìlàamàtɛ̀rɛ bara Andebiyo kulu ŋmɛnɛ àdiini nɔ̀ , nŋa yǎ binɛ bara Irikpɛ ŋmɛnɛ àdiini kâ À fisau bɔ̀rɔ̀ kulu sɛ, à binɛ na bara àdiini ká ǎ fisauyo nna Làarubuyo tìkì .

Àlsìlàamàtɛ̀rɛ yǎ bara bɔnkaani hini cimi ŋmɛnɛ Anduniya kuna, ka yēi ka bara hunayo hɛ̀nnɔ kàanɔ gɔ̀ngɔ̀rɔ̀ntɛ ŋmɛnɛ Làahara kuna .

Àlsìlàamàtɛ̀rɛ yǎ bara àdiini gùre fɔ ká ǎ tutu hǔnde nna gaa bimbiri bùkaatayo sɛ, nna bɔ̀rɔ̀tɛ̀rɛ ŋmɛnɛ nàwiyayo kulu beenaniyo sɛ, Irikpɛ Ká Ǎ Beeriyo cì :

﴿قَالَ ٱهۡبِطَا مِنۡهَا جَمِيعَۢاۖ بَعۡضُكُمۡ لِبَعۡضٍ عَدُوّٞۖ فَإِمَّا يَأۡتِيَنَّكُم مِّنِّي هُدٗى فَمَنِ ٱتَّبَعَ هُدَايَ فَلَا يَضِلُّ وَلَا يَشۡقَىٰ 123 وَمَنۡ أَعۡرَضَ عَن ذِكۡرِي فَإِنَّ لَهُۥ مَعِيشَةٗ ضَنكٗا وَنَحۡشُرُهُۥ يَوۡمَ ٱلۡقِيَٰمَةِ أَعۡمَىٰ124﴾

«Irikpɛ cì (Andébi Aadama nna à wèi Hawaau sɛ̀) : Wà zùmmu, noo bɔ̀rɔ̀ hinka wɔ̀ (nna Ibiliisu) kulu , zǎ àljanna kuna (ka kpee ganna bɔ̀nŋɔ̀) , noo bara cɛ̀rɛ sɛ ibɛrɛ̀yo nɔ̀ ya, àmma dě siriya nna kpàarɛ fɔ kà noo sɛ zǎ A Dɔ , warka à nà A siriya nna A kpàarɛ̄ di gana su ba dɛrɛ hìnì à binɛ su ba ci bɔnŋɔ futukpɛ 123

Warka nŋa nà banna bɛrɛ A Tila (ká à bó hɔ̀nŋɔ̀ nnā) sɛ ba gonna hunayo masùntɛ , ciyámā kɛiyo hɛnɛ Iri 'n dù ka à turanī à mǒ bara dànā 124 » [Taahaa : 123-124].

Hànfàani fɔ̀ àlsìlàamaa duwa Anduniya nna Làahara kuna ?

Àlsìlàamàtɛ̀rɛ gonna hànfàani bèeri jirimàntɛyo , ǹ kuna nɔ̀ :

- Bàa nna jirima dǔri Anduniya kuna ká bɔ̀rɔ bó bara Irikpɛ sɛ tǎm gànna , dě bɔ̀rɔ binɛ na bara Irikpɛ sɛ tǎm ǎ bara tǎm bìnɛ̀ bā nna sèitam nna kɔdɛ̌i sɛ nɔ̀.

- Bàa dǔri nna ká Irikpɛ ba à kɔɔsu Hanu Kɔ̀kɔ̀rɔ̀ kuna, À Kpèitɛ̀rɛ yarda mà tɔ à ga, Irikpɛ mà yēi ka à dàmu Àljannā à 'n dùwaa bàa nna Irikpɛ yarda nna hunayo hɛ̀nnɔ gɔ̀ngɔ̀rɔ̀ntɛ , nna ká bɔ̀rɔ̀ ba yèenā nìnɛ̀ ŋmɛnɛ àzaaba ga .

- Hànfàaniyo di kuna nɔ̀ ká ciyámā kɛiyo hɛnɛ (laahara) ciminɔ̀ɔkpɛ bó gono nɔ̀ nna Andébiyo nna cimìtèeriyo nna warkáayo ǹ bu honŋu gãnyi nna bɔ̀rɔ̀ hɛ̀nnɔyo, ifɔ kàanɛ̄ yǎ dù ka tɔ gɔ̀rɔ̀kàsìnɛ̀yo wɔ̀ ! warka binɛ à na cimi nɔ nŋa bó gono nɔ̀ nna tooluyo nna bɔ̀rɔ̀ làalɔyo nna tàali tɛ̀ɛkpɛɛyo nna barna tɛ̀ɛkpɛɛyo.

- Warkáayo Irikpɛ ba ǹ dàmu Àljanna , ǹ bó hunayo nɔ̀ hunayo hɛ̀nnɔ kàanɔ gɔ̀gɔ̀rɔ̀ntɛ kuna ká à sinna buyo dě binɛ zɛŋɛi dě binɛ doori dě binɛ zèenɛ̀ dě binɛ binɛ̀ bibi , Irikpɛ mǒ hàikáayo ň bāa kulu tɛ ǹ sɛ, warkáayo nŋayo ba huro nìnɛ̀ bó gono nɔ̀ àzaaba gɔ̀ngɔ̀rɔ̀ntɛ ká à suu kanti kuna .

- Àljanna di kuna kàanɛɛyo káayo mɔɔ na taba ká diya gono, hanŋa fɔ binɛ na taba ka mãa ǹla, ǹ binɛ mosom ná taba kà bá bɔ̀rɔ̀ fɔ làsabu kuna, zaŋa ya ŋmɛnɛ cimmani hàyàyo kuna nɔ̀ Irikpɛ Ká Ǎ Beeriyo ŋmɛnɛ cìyo :

Nŋ Irikpɛ Ká Ǎ Beeriyo cì :

﴿فَلَا تَعۡلَمُ نَفۡسٞ مَّآ أُخۡفِيَ لَهُم مِّن قُرَّةِ أَعۡيُنٖ جَزَآءَۢ بِمَا كَانُواْ يَعۡمَلُونَ17﴾

«Hǔndē fɔ suu bei binɛ̀ kaaani hàyà ka ǹ siriyanī ka tuku ǹ (ciminɔ̀ɔkpɛɛyo) sɛ ká à bara gbei (hɛ̀nnɔyo) káayo) ǹ dom gono Anduniya kuna koo tɛ ŋmɛnɛ bànā 17» [Al-Sajda : 17].

Hàsaara fɔ yǎ gono warka à nà bara àlsìlaama sɛ ?

Bɔ̀rɔ̀ɔ zām beiyo ká à bayo nna à jirimaa bìsayo (beiyo kulu) nŋa nɔ̀ Irikpɛ beiyo , à ba yēi ka zāmu ciminɔyo Irikpɛ sɛ ká ǎ bɔ̀rɔ gomini lǎakali kaniyo Anduniya kuna nna hunayo hɛ̀nnɔ gɔ̀ngɔ̀rɔ̀ntɛ Laahara kuna .

Bɔ̀rɔ ba zām ciminɔyo Tila ká à bayoo bìsayo (tilayo kulu) ká Irikpɛ zumanī bòroo sɛ sɛ nna à ganayo .

À ba zām ciminɔyo Andebi bèeri bèeri jìrìmàntɛyo sɛ zaŋa ká à ba zām gonoyo nna ǹla Àljanna kuna ciyámā kɛiyo hɛnɛ, ka dù ka ba bara sètamyo nna gbei làalɔtɛ̀ɛkpɛɛyo nna tooluyo sɛ gɔ̀rɔ̀kàsìnɛ̀ nìnɛ̀ fū kuna, fū di nna gɔrɔkasinɛ di binɛ mutu ka mɛɛri !

Irikpɛ Ká Ǎ Beeriyo cì :

﴿قُلۡ إِنَّ ٱلۡخَٰسِرِينَ ٱلَّذِينَ خَسِرُوٓاْ أَنفُسَهُمۡ وَأَهۡلِيهِمۡ يَوۡمَ ٱلۡقِيَٰمَةِۗ أَلَا ذَٰلِكَ هُوَ ٱلۡخُسۡرَانُ ٱلۡمُبِينُ 15 لَهُم مِّن فَوۡقِهِمۡ ظُلَلٞ مِّنَ ٱلنَّارِ وَمِن تَحۡتِهِمۡ ظُلَلٞۚ ذَٰلِكَ يُخَوِّفُ ٱللَّهُ بِهِۦ عِبَادَهُۥۚ يَٰعِبَادِ فَٱتَّقُونِ16﴾

«Cì : wà bei ká hàsàaràntɛ bɔ̀ŋɔ̄ bɔ̀ŋɔ̄ɔyo nɔ̀ warkáayo ǹ ci kɔɔnuyo ka zāmu ǹ bɔ̀ŋɔ̄ɔyo nna ǹ bòroo ciyáma kɛiyo hɛnɛ, zaŋa ya yá binɛ bara hàsàara bàtùmɛ̀ kpàarɛ ŋmɛnɛ 15

Nìnɛ̀ làmmà làmmàntɛyoo gono ǹ sɛ ǹ bɔ̀nŋɔ̀dɔɔ nna ǹ ganna ganna kàmmɛyo, hàika Irikpɛ gu À tǎmyo hamburanī nnā nɔ̀ ya, à sɛ gànna noo A tamyo wà hamburu Hɛi 16» [Az-Zumaru : 15-16].

À sɛ gànna warka à bāa yèenaayo làahara kuna à bara à ga tilasì à 'n bara àlsìlàama ka bara Irikpɛ gànàkpɛ dèndènìkpɛ nna À dìyà (Irikpɛ mà à fɔ̌ ka à saabu ka à yeenanī).

Cimiyo káayo Andebiyo nna Dìyàyo kulu nà mɛɛfɔ tɛ̀ ǹ bɔ̀nŋɔ nɔ̀ ká Laahara kuna bɔ̀rɔ̀ fɔ su ba yèena fàasse àlsìlàamayo káayo nna cimi nɔ Irikpɛ sɛ Kpei Ká Ǎ Beeriyo, ka na wece bá àfɔ tɛ À sɛ bɔ̀ɔta ŋmaayo À sɛ kuna , ka yēi ka cimi nɔ Andebiyo nna Dìyàyo kulu sɛ. Dě ya Dìyàyo gànàkpɛɛyo kulu káayo ǹ bara ǹ sɛ ciminɔ̀ɔriyo ǹ cìmmànìkpɛɛyo ba huro Àljanna nɔ̀ ya, ka yèena nìnɛ̀ ga .

Warkáayo ǹ dom gono Andebi Muusa záamani ka cimi nɔ à sɛ ka à cìba cibayo gana ǹ kuluyo di bara àlsìlaamayo nna cimìnɔ̀ɔriyo nna bɔ̀rɔ̀ hɛ̀nnɔyo nɔ̀ ya, amā Irikpɛ ŋmɛnɛ Andébi Iisa dɔ̀ntɔyo bannā à ci tilasì Muusa gànàkpɛɛyo ga ǹ mà cimi nɔ Iisa sɛ ka à gana ,

Warkáayo ǹ nà cimi nɔ Iisa sɛ còroo di àlsìlaamayo nna bɔrɔ hɛ̀nnɔyo nɔ̀ ya, warka cɛ̀rɛ à honŋu cimi nɔyo Iisa sɛ ka cì : a ba cìnnì ka gono Andébi Muusa ŋmɛnɛ àdiini bɔ̀nŋɔ̀ nɔ̀ , cɛ̀rɛ̀kpɛɛ di na bara cimi nɔ̀ɔkpɛ nɔ̀ ya; domi à honŋu cimi nɔyo Andébi fɔ ká Irikpɛ nà à dɔ̀ntɔ sɛ.

Ya nɔ̀ Irikpɛ ŋmɛnɛ dìyàyo kɔkɔ̀rɔ̀ Muhammadu (Irikpɛ mà à fɔ̌ ka à saabu ka à yeenanī) dɔ̀ntɔyo banna, à cì tilasì bɔ̀rɔ̀ kulu ga ǹ mà cimi nɔ à sɛ. Irikpɛ Di yá nà Muusa nna Iisa dɔ̀ntɔ, Nŋa yǎ yàara ka dìyàyo mɛ̀ɛwì Muhammadu dɔ̀ntɔ , à sɛ warka à ci Muhammadu dìyàtɛ̀rɛ sɛ gùtùlu ka cì : à ba cìnnì koo gono Muusa dě binɛ Iisa ganayo bɔ̀nŋɔ̀ nɔ̀ , à kpɛɛ di nà bara cimi nɔ̀ɔkpɛ nɔ̀ ya .

À binɛ suu tɔ bɔ̀rɔ mó cì ká à gu àlsìlaamayo jirimanī, zaŋa ká à suu tɔ à yèenaayo làahara kuna sɛ à mǒ mɔ̀nŋɔ̀ntɛyo salàa ko gu ǹ tɛ̀ɛmako . Haika à de bara nɔ̀ ká à suu tɛ̀ se à 'n bara cimi nɔ̀ɔkpɛ Irikpɛ sɛ nna À Tilayo nna À Dìyàyo nna Hànu Kɔ̀kɔ̀rɔ̀ sɛ; Irikpɛ mà dù ka nŋayo di tà à sɛ ! À gànna tàali fɔ si ká ǎ bayo ka tɔ wece tɛyo Irikpɛ sɛ nna Irikpɛ gutulùyo nna Dìyàtɛ̀rɛ ká Irikpɛ nà à zumanī zām ka tā de binɛ À Kpèitɛ̀rɛ dìyàyo kɔ̀kɔ̀rɔ̀ Muhammadu (Irikpɛ mà à fɔ̌ ka à saabu ka à yeenanī) ŋmɛnɛ dìyàtɛ̀rɛ honŋūyo .

Ká à bara ya ni, Yahuudiyo nna Nasaarayo nna bɔ̀rɔ̀ fɔ ŋmàanīyo káayo ǹ mãa Irikpɛ dìyà Muhammadu (Irikpɛ mà à fɔ̌ ka à saabu ka à yeenanī) dìyàtɛ̀rɛ ka dù ka honŋū cimi nɔyo à sɛ ka honŋū huroyo Àlsìlàamàtɛ̀rɛ ŋmɛnɛ àdiini kuna, ǹ ba gono nìnɛ̀ fū kuna nɔ̀ koo gɔ̀ngɔ̀royo à kuna saa kulu, Irikpɛ ŋmɛnɛ sàriya ka À tɛ nɔ̀ ya , à nà bara bòroo kuna bɔ̀rɔ̀ fɔ ŋmɛnɛ sari tɛyo , Irikpɛ Ká Ǎ Beeriyo cì :

﴿إِنَّ ٱلَّذِينَ كَفَرُواْ مِنۡ أَهۡلِ ٱلۡكِتَٰبِ وَٱلۡمُشۡرِكِينَ فِي نَارِ جَهَنَّمَ خَٰلِدِينَ فِيهَآۚ أُوْلَٰٓئِكَ هُمۡ شَرُّ ٱلۡبَرِيَّةِ6﴾

«Warkáayo ǹ ci cefèriyo , zǎ tilakpɛɛyo nna wecetɛ̀ɛkpɛɛyo Irikpɛ sɛ kuna , ň kpee koo gono jahannama nìnɛ̀ kuna koo gɔ̀ngɔ̀rɔ̀yo à kuna, nŋayo yá bara hàliitayo kuna ilàalɔyo 6 » [Al-bayyina : 6].

Dě ya ká dìyàtɛ̀rɛ kɔ̀kɔ̀rɔ̀ zùmmu bòroo sɛ zǎ Irikpɛ dɔ, à ci tilasì bɔ̀rɔ̀ kulu ká à ba mãa Àlsìlàamàtɛ̀rɛ senni ka ba mãa dìyà kɔ̀kɔ̀rɔ̀ Muhammadu (Irikpɛ mà à fɔ̌ ka à saabu ka à yeenanī) senni ga à 'n cimi nɔ à sɛ ka à sàriya gana ka dìyà di gana à fòoroyo nna à honŋɛyo kuna, nŋa di gànna warka à ba mãa dìyàtɛ̀rɛ kɔ̀kɔ̀rɔ̀ wɔ̀ senni ka ba honŋū àla, Irikpɛ su ba hàifɔ tā à sɛ, À de ba à nɔ àzaaba nɔ̀ Laahara kuna.

Cìnɛ̀yo wɔ̀ cimmanīyo hàyàyo kuna nɔ̀ Irikpɛ Ká Ǎ Beeriyo cíyo :

﴿‌وَمَن يَبۡتَغِ غَيۡرَ ٱلۡإِسۡلَٰمِ دِينٗا فَلَن يُقۡبَلَ مِنۡهُ وَهُوَ فِي ٱلۡأٓخِرَةِ مِنَ ٱلۡخَٰسِرِينَ85﴾

«Warka à gu Irikpɛ gana nna àdiini fɔ ká à na bara Àlsìlàamàtɛ̀rɛ ǹ suu tà à sɛ , làahara kuna à 'n dù koo gono hàsàaràntɛyo kuna 85»

[Aal-Imrana : 85].

Nŋa Irikpɛ Ká Ǎ Beeriyo cì :

﴿قُلۡ يَٰٓأَهۡلَ ٱلۡكِتَٰبِ تَعَالَوۡاْ إِلَىٰ كَلِمَةٖ سَوَآءِۭ بَيۡنَنَا وَبَيۡنَكُمۡ أَلَّا نَعۡبُدَ إِلَّا ٱللَّهَ وَلَا نُشۡرِكَ بِهِۦ شَيۡـٔٗا وَلَا يَتَّخِذَ بَعۡضُنَا بَعۡضًا أَرۡبَابٗا مِّن دُونِ ٱللَّهِۚ فَإِن تَوَلَّوۡاْ فَقُولُواْ ٱشۡهَدُواْ بِأَنَّا مُسۡلِمُونَ64﴾

«Cì : Noo Tilakpɛɛyo wà kà mɛɛcìnɛ̀ fɔ ká à bara deidei koo sawayo iriyo nna nooyo bìnni dɔ : iri ʼn suu bɔ̀ɔta ŋmǎ fàase Irikpɛ sɛ, iri 'n suu wece bá àfɔ tɛ À sɛ, iri 'n suu cɛ̀rɛ zā iri kɔ̀nù kɔ̀nu koo cɛ̀rɛ ci irikpɛɛyo ka Irikpɛ (Allaah) nàm . sá di dě ǹ nà banna bɛrɛ , wà cì ǹ sɛ : wà sěda ká iriyo gu iri bɔ̀ŋɔ̄ɔyo nɔyo Irikpɛ Ká Ǎ Beeriyo sɛ 64 »

[Aal-Imrani : 64].

Ifɔ yǎ tilasìyo àlsìlaama ga ?

Cimi nɔyo ziigo idū wɔ̀ sɛ̀ yǎ bara tilasì àlsìlaama ga :

1- Cimi nɔyo Irikpɛ Ká Ǎ Beeriyo sɛ, nna ká Nŋa nɔ̀ Hàlìitàkpɛ, hunàyo hàyà (arziki) Gòmìnìkpɛ, hunayo Bɛ̀rɛ̀ Bɛ̀rɛ̀kpɛ, Mɛ̀ikpɛ, hàifɔ nà bara zàŋa À Tàka , À sinna wèi bèle kōo, nna ká À Fɔlɔnku yǎ hìmāayo nna bɔ̀ɔta ŋmǎayo à sɛ, nna ká ǹ mà suu bɔ̀ɔta hàifɔ ŋmàanī sɛ koo margu nna Àla , nna ká ǹ mǒ nàanɛyo binɛ kuna ká bɔ̀ɔta ŋmǎayo hàifɔ kulu sɛ ka À nàm bara bɔ̀ɔta ŋmǎayo kɔ̄ɔnū nɔ̀ .

2- Cimi nɔyo Malaayikayo sɛ ká ǹ bara nɔ̀ Irikpɛ Ká Ǎ Beeriyo tamyo, À nà ǹ hàliita nɔ̀ nna asike, nŋa À jisi ká ǹ gbeiyo kuna nɔ̀ ǹ mǒ zùmmu nna dìyàtɛrɛ À ŋmɛnɛ Andebiyo sɛ.

3- Cimi nɔyo tilayo kulu ká Irikpɛ nà ǹ zumanī À ŋmɛnɛ Andebiyo sɛ (zàŋa Attaura, nna Injiila - zǎ ǹ na kàmmɛ̀ damu ǹ kuna ka ǹ bɛ̀rɛ bɛrɛ jina - ), Tilayo di binɛ kɔ̀kɔ̀rɔ̀ nɔ̀ àl-kùranī jìrìmàntɛ.

4- Cimi nɔyo Dìyàyo kulu sɛ zàŋa Nuuhu, nna Ibraahima, nna Muusa, nna Iisa, nna ǹ kɔ̀kɔ̀rɔ̀ Muhammadu, ǹ dù ka bara boroo kuna nɔ̀. Irikpɛ nà ǹ tɛ̀ɛmako nna dìyàtɛ̀rɛ ka séedayo nna màamaaci hàyàyo káayo ǹ gu ǹ cimi tɛ̀yo cìba nɔɔnɔ ǹ sɛ .

5- Cimi nɔyo hanu kɔ̀kɔ̀rɔ̀ sɛ sá ká Irikpɛ ba bɔ̀rɔ̀ sìntèyo nna bɔ̀rɔ̀ kɔ̀kɔ̀rɔ̀yo turanī, Irikpɛ mà hukumusi tɛ A hàliitayo bìnni ka cimi nɔ̀ɔkpɛɛyo dam Àljanna, ceferiyo nŋayo nìnɛ̀ .

Cimi nɔyo hàika Irikpɛ jìsi sɛ, nna ká Irikpɛɛ hài kulu bei, zǎ hàika à tɛ̀ wakati ká à bisa kuna, nna hàika à ba kǎ tɛ wakati ká ǎ kà kuna , nna ká Irikpɛ nà hài kulu bei ka binɛ ka zàŋa ya hàntum ka yēi ka bāa à tɛ̀yo , nŋa À nà hài kulu hàliita .

Nna ká n mà Irikpɛ bɔ̀ɔta nna hàika À jìsi sariya zǎ jingari nna zàkāa kǎyo nna mɛɛhauyo, nna haji tɛyo dě yiiko nna hini gono n sɛ, kpɛ̌nɛ à bara à ga tilasì nɔ̀ à mà à ŋmɛnɛ àdiini beiyo cèeji, à ŋmɛnɛ àdiini ká nŋa yǎ bara à bɔnkaani Anduniya kuna nna à yèenaayo Laahara kuna hunù dɔ .

***

الفهرس

Nɔrukpɛ nɔ̀ Hàlìitàkpɛ Bèeri 5

Kpei Di Ká À bara Nɔrukpɛ, Hàlìitàkpɛ, Arziki Gòmìnìkpɛ nɔ̀ Irikpɛ Kpei Ká Ǎ Gɛiyo koo Beeriyo . 5

Nɔrukpɛ Hàlìitàkpɛ ŋmɛnɛ Zěm Zěmyo : 7

Irikpɛ Di Ká À Sɛ nɔ̀ ň bɔ̀ɔta ŋmaa gu À Bɔŋɔɔ zěmyo nɔ̀ nna zěmyo káayo ň tɔyo koo kùbeyo 8

Ifɔ gànna nɔ̀ Hàlìitàkpɛ Bèeri Jìrìmàntɛ Di nà iri háliita ? Nŋa ifɔ Ǎ bāa nna iriyo ? 12

Ifɔ gànna nɔ̀ dìyàyo hɛi ba ka bara ŋmàanì ŋmàanì ? 15

Bɔ̀rɔ̀ fɔ suu bara ciminɔ̀ɔkpɛ faasede à nà cimi nɔ dìyàyo di kulu sɛ̀. 16

Ifɔ ň cɛ àl-kùranī jìrìmàntɛ ? 18

Ifɔ nɔ̀ Àlsìlàamàtɛ̀rɛ ? 19

Àlsìlàamàtɛ̀rɛ bara bɔnkaani hini nɔ̀ 22

Hànfàani fɔ̀ àlsìlàamaa duwa Anduniya nna Làahara kuna ? 23

Hàsaara fɔ yǎ gono warka à nà bara àlsìlaama sɛ ? 25

Ifɔ yǎ tilasìyo àlsìlaama ga ? 29

***

ddn443v2.0 - 28/04/2026

ka sìima nna ká ň haifɔ ŋmàaniyo bɔ̀ɔta ka Irikpɛ nàm.

bɔ̀nŋɔ̀dɔ nna ganna di

Mɛi yá nà Anduniya hàliita ? Mɛi yá nà hɛ̄i bɔ̀ŋɔ̄ hàliita ? Ifɔ gànna ? (Dendi)

Other Translations 25