Àlsìlàamàtɛ̀rɛ bara Irikpɛ dìyàyo kulu ŋmɛnɛ adiini nɔ̀ - Dendi

PHPWord

الإِسْلَامُ دِينُ رُسُلِ اللهِ

Àlsìlàamàtɛ̀rɛ bara Irikpɛ dìyàyo kulu ŋmɛnɛ adiini nɔ̀

اللَّجْنَةُ العِلْمِيَّةُ

بِرِئَاسَةِ الشُّؤُونِ الدِّينِيَّةِ بِالمَسْجِدِ الحَرَامِ وَالمَسْجِدِ النَّبَوِيِّ

بِسْمِ اللهِ الرَّحمَنِ الرَّحِيمِ

Àlsìlàamàtɛ̀rɛ bara Irikpɛ dìyàyo kulu ŋmɛnɛ adiini nɔ̀

Beiyo ŋmɛnɛ Hanŋa ká ǎ latiyo nna Adiini Sénni tɛyo Bɔ̀nŋɔ̀tɛ̀rɛ Gbei dɔ̄ ká à gono Kǎba Jìnjire nna Andebi Jìnjire kuna

Àlsìlàamàtɛ̀rɛ bara nɔ̀ jìndè nɔyo kùbèntɛ Irikpɛ sɛ Kpei Ká Nŋa nɔ̀ haliita kulu Hàlìitàkpɛ nna à Bɛ̀rɛ̀ Bɛ̀rɛ̀kpɛ, nna bɔ̀ŋɔ kùsǔm nɔyo À sɛ À bàkàsinɛ nna À bèeraniyo nna À jirimaniyo bɔ̀nŋɔ̀. Àlsìlàamàtɛ̀rɛ di kɔsɛ nɔ̀ cimi nɔyo Irikpɛ sɛ, nna cimi nɔyo ká Nŋa nɔ̀ Hàlìitàkpɛ , À bàasi hɛ̀i kulu bara haliita nɔ̀, Nŋa yǎ hìmaayo nna bɔɔtayo À sɛ À Fɔlɔnku À sinna wece, hɛ̀ifɔ si ká ǹ ba bɔɔta ŋmáa à sɛ nna cimi fàase Nŋa. À gonna Maayo Káayo Ǹ Bòoriyo Bìsayo nna Zémyo Káayo Ǹ Jirima nna Ǹ Kùbeyoo Bìsayo. Nŋa Nŋa yǎ gonna Tɔyo ka Kube Hɛnnɔ Kulu ká hartayo fɔ si À Kuna .À ná hɛi Ǹ binɛ ná À hɛi , hɛifɔ binɛ ná bara À cinɛ bère À hìmàkàsìnɛ̀. À suu zùmmu ka hulo À hàliita fɔ gáa kunā À binɛ suu À Bɔŋɔ bɛ̀rɛ ka ci à hàliita fɔ tàka .

Àlsìlàamàtɛ̀rɛ bara Irikpɛ Ká Ǎ Béeriyo ŋmɛnɛ adiini nɔ̀ ká À suu adiini fɔ ta boroo sɛ à bàasi. Nŋa yǎ dù ka bara adiini ká Andebiyo kulu kà nnā (yèenaayo mà tɔ ǹ ga).

Àlsìlàamàtɛ̀rɛ ŋmɛnɛ kɔsɛyo kuna nɔ̀ cimi nɔyo dìyàyo kulu sɛ, nna cimi nɔyo ká Irikpɛ nà dìyáyo di dɔ̌ntɔ kìtɛ nɔ̀ domi ǹ mà À Fòoroyo tɔyani À tàmyo ga, nŋa À nà tilayo zumanī ǹ sɛ, nŋa dìyàyo di kɔ̀kɔ̀rɔ̀ nɔ̀ Muhammadu (fɔ̌yo nna yèenaayo mà tɔ à ga) ká Irikpɛ dɔ̌ntɔ nna À Kpèitɛ̀rɛ ŋmɛnɛ sàriya ká à bara dìyàyo káayo ǹ jina à sɛ ŋmɛnɛ sàrìyàyo mɛ̀ɛwì nna ǹ tùusùkpɛ. Nŋa Irikpɛ nà à tɛ̀ɛmako nna màamaaci hàyà bèeriyo ká ǹ kuna wɔ̀ɔka à bàyoo bìsayo nɔ̀ Àlkùrani Jìrìmàntɛ Ká à bara hàliitayo kulu Nɔrukpɛ ŋmɛnɛ Sénni , tila ká à bayoo bìsayo tila kulu kà bɔ̀rɔ̀ tɛ̀rɛ bei nɔ̀ ya, tila nɔ̀ ya ká ǎ haliita kulu mɔnŋɔyanīyo à tàka kànaayo, hɛ̀ika à gono à kuna dɔ kàmmɛ nna à sénni gure dɔ kàmmɛ nna à sɛsɛrɛyo dɔ kàmmɛ. À kuna hìnì cìbayo ka kpee nnā cimi dɔ gono, cimi ká ǎ tɔyanī bɔnkáani ga anduniya kuna nna laahara, à dù kó sarīyo nɔ̀ hali hɔ̃ nna làarubu cìnɛ̀ ká à zùmmú nnā , ǹ ná bâ ibīi gùre fɔ bɛrɛ à kuna ǹ binɛ ná à bàaru .

Kpɛ̌ɛnɛ Àlsìlàamàtɛ̀rɛ kɔsɛyo kuna nɔ̀ cimi nɔyo malaayikayo sɛ, nna cimi nɔyo hanu kɔkɔ̀rɔ̀ sɛ, hanu di kuna binɛ nɔ̀ Irikpɛɛ boroo turanī zǎ ǹ sàarɛ̄ɛyo kuna ciyaama kɛiyo hɛnɛ domi À mà ǹ gbeiyo kabu ka ǹ bana tɛ ǹ sɛ. Warka à nà ihɛnnɔyo tɛ cimi nɔyo bɔ̀nŋɔ̀ gonna gomini dawwàmàntɛ Àljanna kuna, warka binɛ à céférì ka gbei làalɔyo tɛ gonna azaaba bèerì nìnɛ̀ kuna .Ya nɔ̀ kpɛ̌nɛ Àlsìlàamàtɛ̀rɛ kɔsɛyo kuna nɔ̀ cimi nɔyo hɛ̀ika Irikpɛ haw ka jisi sɛ à ŋmɛnɛ ihɛnnɔ aw à ŋmɛnɛ ilàalɔ.

Àlsìlàamayoo cimi nɔyo nɔ̀ ká Andebi Isa bara Irikpɛ tàm nɔ̀ ka yei ka bara À dìyà, kó cimi nɔyo kpɛ̌nɛ ká à ná bara Irikpɛ kōo; domi Irikpɛɛ Bayo nɔ̀ kó Bara Jirima Béerìkpɛ Ká à suu tɛ À 'n gonna wèi bère kōo. Àmma Irikpɛ nà iri nɔ làabaari àlkùrani kuna ká Isa bara Andebi nɔ̀ ká Irikpɛ nà à gòminī munjiza(1) tùutuuma, nŋa Irikpɛ nà à dɔ̌ntɔ nɔ̀ à mà à boroo cɛ ka kpee nnā bɔ̀ɔta ŋmáayo Irikpɛ Fɔlɔnku Ká À sinna wece sɛ ga. Nŋa À nà iri beiyanī ká Isa ná cèeji boroo ga ǹ mà bɔ̀ɔta à sɛ, cɛrɛ bɔŋɔ mòsóm bara ká à Hàlìitàkpɛ sɛ nɔ̀ ǎ bɔ̀ɔta. ŋmá.¹

Àlsìlàamàtɛ̀rɛ bara adiini nɔ̀ ká ǎ sawayo nna bɔ̀rɔ haliita tàbiya dèidèintɛ nna laakali àlàafiàntɛ, nŋa bìnɛ̀ dèidèintɛyo gu à tayo. Hàlìitàkpɛ Jirima Bèerìkpɛ yǎ nà à ci àsaria hinì À hàliitayo sɛ, à binɛ bara alhéeri nna bɔnkaani hinì nɔ̀ bɔ̀rɔ̀ kulu sɛ. À suu dimi fɔ fisau ka tɛkɛ dimi fɔ ga, dě binɛ gáa kama fɔ ka tɛkɛ gáa kama fɔ ga, à kuna boroo kuluu sawayo nna cɛrɛ nɔ̀. Àlsìlàamàtɛ̀rɛ di kuna bɔ̀rɔ̀ fɔ su fisauyo kó tɛkɛyo à hansinɛ̀ ga fàase nna à gbéi hɛnnɔ zaka .

À bara tilasi nɔ̀ bɔ̀rɔ̀ làakalintɛ kulu mà cimi nɔ Irikpɛ sɛ ká Nŋa yǎ Bara Nɔrukpɛ, nŋa àlsìlàamàtɛ̀rɛ bara adiini (yardantɛ Nɔrukpɛ di dɔ) , nŋa Muhammadu (Irikpɛ mà à fɔ̌ ka à sáabu ka à yénanī) bara dìyà, zaŋa ya binɛ bara fòoro fɔ nɔ̀ ká à kuna bɔ̀rɔ sinna fisauyo fɔ ; domi ciyaamā kɛiyo hɛnɛ Irikpɛ ba à hã hɛika á tùtu nnā diyàyo sɛ; dě à bara cìmìnɔ̀ɔri nɔ̀ à gonna bàa nna bana bèerì jìrìmàntɛ, dě binɛ à bara cèfri nɔ̀ hasaara bàtùmɛ kpaarɛ ŋmɛnɛ gono à sɛ.

Àlsìlaama binɛ nɔ̀ warka ǎ cì : (Ach'hadu an laa ilaaha illal-lɔɔhu wa Ach'hadu anna Muhammadan rasuulul-lɔɔhi)

Á sěda ká kpei fɔ si ká à hima ǹ mà bɔ̀ɔta ŋmáa à sɛ nna cimi fàase Irikpɛ, nŋa á sěda ká Muhammadu bara Irikpɛ dìyà), à 'n dù kó gonna mɛɛcìnɛ̀ di ŋmɛnɛ beiyo kó cimi nɔyo à sɛ, ka yei kó àlsìlàamàtɛ̀rɛ ŋmɛnɛ àsariya cìnniyo beiyo céeji cɛɛnɛ cɛɛnɛ; domi à 'n dùwa kó tùnu nna hɛ̀ikáayo Irikpɛ nà ǹ ci à ga tilasi .

***

ddn446v3.0 - 06/05/2026

Màamáaci hàyà ká ǎ hunuyo ŋmàani nna hɛ̀ika à bara bèintɛ dɔ̀ɔnɛ̀ntɛ ká hàliitayoo mɔ̀nŋɔ̀ à tàka tɛyo.

Àlsìlàamàtɛ̀rɛ bara Irikpɛ dìyàyo kulu ŋmɛnɛ adiini nɔ̀ (Dendi)